Foda paralajmëron ndryshime në formacion: Një nga lojtarët e rinj pritet të debutojë ndaj Izraelit

Në prag të sfidës së Ligës së Kombeve kundër Izraelit, përzgjedhësi i Përfaqësueses së Kosovës, Franco Foda, ka dalë para mediave për të ndarë pritshmëritë e tij për këtë përballje. Tekniku gjerman ka lënë të kuptohet se mund të ketë lëvizje në përbërjen startuese, duke hapur rrugën për lojtarët e sapoardhur. Gjatë konferencës për shtyp, Foda theksoi se tre prurjet e reja në ekip kanë lënë mbresa pozitive gjatë seancave stërvitore. Ai nuk e përjashtoi mundësinë që njëri prej tyre të zbresë në fushë që nga minuta e parë në ndeshjen e nesërme. “Kemi ndjekur me vëmendje formën e Kamberit, Enisit dhe Kurtulushit. Të gjithë kanë treguar cilësi dhe na kanë lënë përshtypje të mirë. Ekziston mundësia reale që njëri prej tyre ta nisë ndeshjen nga fillimi”, deklaroi strategu i Kosovës. Kujtojmë se dueli ndërmjet Kosovës dhe Izraelit do të zhvillohet nesër në stadiumin “Fadil Vokrri”, me fillim nga ora 15:00.