Skandali me buxhetin në shëndetësi, Ismaili ngre alarmin për rritje abuzive të çmimeve deri në 364%

Deputeti i Partisë Demokratike të Kosovës, Uran Ismaili, ka hedhur akuza të rënda ndaj Ministrisë së Shëndetësisë për keqpërdorim të fondeve publike, duke bërë publike shifra ku çmimet e produkteve medicinale dyshohet se janë rritur deri në 364 për qind nga faza e nisjes së procedurave e deri te finalizimi i kontratave. Gjatë zhvillimit të një interpelance me ministrin e Shëndetësisë, Arben Vitia, e cila u thirr për trajtimin e rastit tragjik të vdekjes së një pacienteje me kancer gjiri dhe mungesën e theksuar të ilaçeve onkologjike, Ismaili theksoi se ka identifikuar tri raste konkrete të abuzimit financiar dhe zvarritjeve burokratike në prokurim. Duke paraqitur detajet e rasteve, ai u shpreh se planifikimi në këtë sektor përbën një dështim të rëndë. Për njërin prej artikujve, sipas tij, procedura ka nisur me vlerën 0.59 euro dhe është mbyllur me 0.89 euro pas një periudhe 224-ditore, duke shënuar një rritje prej 50 për qind. Në rastin e dytë, me një vonesë prej 165 ditësh, çmimi nga 19 cent është ngritur në 0.59 euro, që përkthehet në një diferencë prej 210 për qind. Ndërsa për produktin e tretë, procedura ka filluar me çmimin 7.53 euro dhe katër muaj më vonë kontrata është lidhur në vlerën 34.92 euro, duke kapur një rritje drastike prej 364 për qind. Në fjalën e tij, deputeti i opozitës i ka kërkuar ministrit Vitia ndërmarrjen e menjëhershme të masave disiplinore ndaj udhëheqjes së Shërbimit Spitalor dhe Klinik Universitar të Kosovës (SHSKUK), duke paralajmëruar se çdo pasivitet apo mbrojtje e strukturave drejtuese do ta bëjë vetë ministrin bashkëpërgjegjës për këtë gjendje. Ismaili e mbylli fjalën e tij duke e cilësuar planifikimin aktual si të papranueshëm dhe duke kërkuar reagim urgjent nga bordi, para se abuzimet financiare të dëmtojnë përfundimisht funksionimin e të gjithë sistemit shëndetësor në vend.