Sistemi prokurorial me akt të ri: Miratohet Rregullorja për Mbrojtjen e të Dhënave Personale

Këshilli Prokurorial i Kosovës (KPK) ka zyrtarizuar miratimin e Rregullores për Mbrojtjen e të Dhënave Personale në Sistemin Prokurorial. Ky vendim ka marrë mbështetjen e plotë të anëtarëve përmes shtatë votave pro, pa asnjë votë kundër dhe pa abstenime, ndërkaq dokumenti hyjnë në fuqi që nga dita e sotme. Gjatë seancës plenare, anëtari i KPK-së, Visar Krasniqi, bëri një paraqitje të draft-rregullores, duke theksuar se ajo ka ndjekur të gjitha procedurat e nevojshme të konsultimit me publikun, përfshirë seancat e dëgjimit publik dhe shqyrtimin e vërejtjeve të dërguara nga OSBE-ja. “Draft-rregullorja ka kaluar të gjitha fazat e parapara të konsultimit publik, por ka kaluar edhe dëgjimin publik. Komentet i kemi pranuar nga OSBE-ja, të cilat i kemi shqyrtuar dhe janë diskutuar gjatë trajtimit në Komision. Ato që kanë pasur bazë, natyrisht që janë përfshirë”, u shpreh Krasniqi. Sipas tij, ky është akti i parë normativ i këtij lloji që hartohet ndonjëherë brenda sistemit prokurorial, duke sqaruar tutje themelet juridike dhe qëllimin e këtij dokumenti të rëndësishëm. “Rregullorja nxirret në bazë të nenit 7, paragrafit 1 të Ligjit për Këshillin Prokurorial dhe nenit 40 të Ligjit për Mbrojtjen e të Dhënave Personale. Kjo rregullorja është hartuar për herë të parë në sistemin prokurorial. Qëllimi i hartimit të kësaj rregulloreje ka qenë përcaktimi i parimeve, rregullave, procedurave, përgjegjësive dhe masave teknike e organizative për mbrojtjen e të dhënave personale gjatë përpunimit, ruajtjes, përdorimit, shkëmbimit dhe transferimit të tyre nga institucionet e sistemit prokurorial, pra nga KPK-ja, Zyra e Kryeprokurorit të Shtetit, përfshirë Zyrën për Mbrojtjen e Viktimave, si dhe nga të gjithë prokurorët. Po ashtu, përmes dispozitave të kësaj rregulloreje synohet garantimi i mbrojtjes së të dhënave dhe lirive themelore të njeriut, të personave fizikë, në lidhje me përpunimin e të dhënave personale, në pajtim me Ligjin për Mbrojtjen e të Dhënave Personale”, theksoi ai. Më tej, Krasniqi elaboroi strukturën e brendshme të rregullores, duke njoftuar se ajo përmban gjithsej 42 nene të shpërndara në 10 kapituj të veçantë, teksa vuri in parti theksin te parimet bazë të përpunimit të informacioneve. “Shkurtimisht po ju paraqes përmbajtjen e disa neneve. Kjo rregullorja përmban 42 nene, të ndara në 10 kapituj, dhe do të veçoja shkurtimisht parimet dhe bazën ligjore për përpunimin, ku përcaktohet se sistemi prokurorial përpunon të dhënat personale vetëm kur ekziston baza ligjore, në mënyrë të ligjshme, proporcionale dhe vetëm për qëllime specifike, duke respektuar njëkohësisht nevojën për ruajtjen e hetimit penal”, u shpreh ai. Në fjalën e tij, ai preku edhe të drejtat që u ofrohen qytetarëve, të dhënat e të cilëve trajtohen nga ky sistem, duke dhënë sqarime se në cilat rrethistika mund të vendosen kufizim në ushtrimin e tyre. “Sa i përket të drejtave të subjekteve të të dhënave, rregullohet e drejta e informimit, e qasjes, e korrigjimit, e fshirjes, e kufizimit të përpunimit dhe kundërshtimit, si dhe procedura për realizimin e tyre. Këto të drejta mund të realizohen vetëm në raste të përcaktuara me ligj, kur kjo është e domosdoshme për mbrojtjen e hetimit penal, sigurisë publike ose interesit publik”, shtoi ai. Një tjetër aspekt thelbësor që mbulohet nga rregullorja ka të bëjë me caktimin e profileve zyrtare të ngarkuara me mbrojtjen e të dhënave në të gjithë strukturën prokuroriale. “Po ashtu, lidhur me zyrtarët për mbrojtjen e të dhënave personale, krijohet një rrjet i zyrtarëve në të gjithë sistemin: në Këshill caktohet një Zyrtar për Mbrojtjen e të Dhënave Personale (ZMDP) nga Këshilli, në Zyrën e Kryeprokurorit të Shtetit...”, përfundoi ai.