Kërkesat e Moskës në Abu Dhabi: Largimi i Finlandës nga NATO dhe formësimi i një arkitekture të re sigurie

Delegacioni rus ka parashtruar një sërë kushtesh gjatë bisedimeve diplomatike në Abu Dhabi për zgjidhjen e konfliktit në Ukrainë, të cilat përfshijnë tërheqjen e Finlandës nga aleanca e NATO-s dhe ndalimin e vendosjes së bazave ushtarake të kësaj të fundit në vendet baltike. Këto detaje janë bërë të publike nga media gjermane 'Bild'. Sipas të njëjtave burime, këto nisma joformale, të cilat janë diskutuar me zyrtarët evropianë në kryeqytetin e Emirateve të Bashkuara Arabe, synojnë të shtrihen përtej kufijve të Ukrainës, duke krijuar atë që Moska e cilëson si një “rend të ri të sigurisë në Evropë”. Përfaqësuesit rusë vazhdojnë të mbështeten te pretendimet e mëparshme se qeveritë perëndimore nuk kanë mbajtur premtimet për të mos e zgjeruar NATO-s drejt kufijve rusë. Plani i paqes i paraqitur nga Moska parasheh që Rusia të ruajë kontrollin mbi të gjitha territoret ukrainase që mban aktualisht të pushtuara, si dhe të marrë nën zotërim të gjithë rajonin e Donbasit. Nga ana e saj, Kievi do të detyrohej të hiqte dorë zyrtarisht nga pjesët e mbetura të Donetskut dhe Luhanskut që ndodhen ende nën administrimin e tij. Kushtet parashikojnë gjithashtu demilitarizimin e porteve strategjike të Odesës dhe Nikolajevit, duke ndaluar shfrytëzimin e tyre për qëllime ushtarako-detare, ndërkohë që liria e lundrimit në Detin e Zi dhe Detin Baltik do të rregullohej përmes marrëveshjeve të veçanta. Raporti saktëson se propozimi kërkon një status të përhershëm asnjanës për Ukrainën, duke e përjashtuar përgjithmonë nga anëtarësimi në NATO, por pa penguar aspiratat e saj për t'u bërë pjesë e Bashkimit Evropian. Më tej, kërkesat e Moskës përfshijnë ndalimin e rreptë të çdo bazë ushtarake të NATO-s në republikat baltike – Estoni, Letoni dhe Lituani – si dhe kthimin e Finlandës në statusin e saj të mëparshëm përpara se t'i bashkohej aleancës ushtarake. Sa i përket Moldavisë, strategjia ruse sugjeron transformimin e saj në një republikë federale, e cila do të përbëhej nga territori qendror, rajoni i Transnistrisë dhe Gagauzia. Në skenarin e një integrimi të mundshëm të Moldavisë në BE, dy rajonet e fundit do të kishin të drejtën të organizonin referendume për shpalljen e pavarësisë. Në këmbim të këtyre lëshimeve territoriale dhe gjeopolitike, pala ruse shprehet e gatshme të tërheqë armatimin bërthamor nga Bjellorusia dhe të heqë dorë nga vendosja e raketave me rreze të mesme veprimi në atë vend, sipas të dhënave të publikuara.