Dështon seanca gjyqësore ndaj ish-profesorit Xhevat Krasniqi, mungojnë prokurori dhe pala e dëmtuar

Gjykimi ndaj ish-profesorit të Universitetit të Prishtinës, Xhevat Krasniqi, i cili akuzohet për ngacmim seksual ndaj studenteve të Fakultetit të Mjekësisë, ka dështuar dhe është shtyrë për datën 24 dhjetor, duke filluar nga ora 09:30. Këtë vendim e ka bërë të ditur gjykatësi Bujar Ahmeti, pasi ka konstatuar se në sallën e gjykatës nuk po merrnin pjesë prokurori i shtetit dhe e dëmtuara Donika Veseli. Gjatë seancës, kreu i trupit gjykues theksoi se mungesa e përfaqësuesit të akuzës nuk ishte justifikuar paraprakisht dhe se, në këto rrethana, nuk plotësoheshin kushtet ligjore për zhvillimin e seancës. "Mungon prokurori i shtetit… mungesën nuk e ka arsyetuar. Mungon e dëmtuara Donika Veseli… Në mungesë të prokurorit dhe të dëmtuarës, nuk janë plotësuar kushtet për mbajtjen e seancës. Seanca e radhës caktohet për datën 24 dhjetor, 09:30", deklaroi gjykatësi Ahmeti. Ky zhvillim vjen pas një serie prej nëntë seancash të dështuara gjatë muajve shtator dhe tetor, të cilat ishin shtyrë më herët si pasojë e kërkesave të ndryshme nga palët në proces. Çështja kundër Xhevat Krasniqit mori dhenë pasi ai u denoncua nga 27 studente të Fakultetit të Mjekësisë për ngacmim seksual. Bazuar në dosjen e Prokurorisë së Prishtinës, incidentet e pretenduara kanë ndodhur në periudhën nga janari i vitit 2022 deri në dhjetor të vitit 2023, brenda hapësirave të këtij fakulteti. Organi i akuzës pretendon se i pandehuri ka shfaqur sjellje joverbale joetike dhe ngacmuese, me qëllim cënimi të integritetit personal të viktimave. Në aktakuzë theksohet gjithashtu pozita e tij si ligjërues universitar dhe autoriteti që ai ushtronte mbi studentet. Deri më tani, në aktakuzë janë përfshirë katër palë të dëmtuara. Sa i përket statusit të tij profesional, Krasniqi fillimisht ishte pezulluar nga detyra për një periudhë gjashtëmujore më 23 prill 2024, me vendim të ish-rektorit të UP-së, Qerim Qerimi. Me skadimin e këtij afati, më 23 tetor 2024, rektori aktual Arben Hajrullahu vendosi vazhdimin e pezullimit të tij deri në epilogun përfundimtar të hetimeve nga ana e Prokurorisë.