Bashkëpunim i ri kundër krimit: Hita forcon aleancën me Policinë Kriminale dhe Antimafian italiane

Në kuadër të vizitës së tij zyrtare në Itali, Drejtori i Përgjithshëm i Policisë së Shtetit, Drejtues Madhor Skender Hita, ka zhvilluar një sërë takimesh të nivelit të lartë, me synim konsolidimin e partneritetit strategjik mes autoriteteve ligjzbatuese të Shqipërisë dhe Italisë. Fokus kryesor i këtyre bisedimeve mbetet goditja e pakompromis e krimit të organizuar dhe e grupeve kriminale që operojnë përtej kufijve. Delegacioni shqiptar, i kryesuar nga Hita, u prit në selinë e Drejtorisë Qendrore të Policisë Kriminale nga Zëvendësdrejtori i Përgjithshëm i Sigurisë Publike, njëherazi Drejtor Qendror i Policisë Kriminale, Prefekti Raffaele Grassi, si dhe nga Drejtori i Drejtorisë Hetimore Antimafia (DIA), Gjenerali Nicola Massimo Masciulli. Në këtë takim të rëndësishëm morën pjesë edhe personalitete të tjera të larta si Drejtoresha Qendrore e Shërbimeve Antidrogë, Lorena Di Galante, Drejtori i Shërbimit për Bashkëpunimin Ndërkombëtar Policor, Lorenzo Bucossi, dhe Drejtori i Shërbimit Qendror Operacional (SCO), Marco Calì. Diskutimet u përqendruan në nevojën për një qasje të unifikuar hetimore për të luftuar trafikun e narkotikëve, trafiqet e paligjshme dhe kërcënimet kibernetike. Palët konfirmuan vullnetin për shkëmbim të shpejtë të inteligjencës policore, koordinim më të mirë të operacioneve në terren, goditjen e aseteve financiare të grupeve kriminale, si dhe intensifikimin e përpjekjeve për arrestimin e personave të shpallur në kërkim ndërkombëtar. Drejtori Hita rikonfirmoi angazhimin e Policisë së Shtetit për të rritur kapacitetet e skuadrave të përbashkëta hetimore, duke nënvizuar se lufta kundër strukturave kriminale nuk njeh kufij. Ai garantoi se mbështetja për hetimet e thelluara do të jetë maksimale, për të goditur këto struktura në të gjithë shtrirjen e tyre. Nga ana tjetër, Prefekti Grassi dhe Gjenerali Masciulli vlerësuan lart bashkëpunimin e deritanishëm me Policinë shqiptare, duke veçuar kontributin e Departamentit të Policisë Kriminale dhe Drejtorisë së Forcës së Posaçme Operacionale. Autoritetet italiane shprehën gatishmërinë për të hartuar një strategji të re operacionale, me synimin për të arritur rezultate edhe më konkrete në përballjen me format komplekse të krimit të organizuar.