Nis rifillimi i punës në bllokun A4 të “Kosova A”, KEK jep detajet për tymin e dendur

Korporata Energjetike e Kosovës ka bërë të ditur se gjatë mëngjesit të së premtes ka nisur faza e vënies në punë të bllokut A4 në kuadër të termocentralit “Kosova A”. Sipas sqarimeve nga ndërmarrja, përgjatë këtij intervenimi teknologjik mund të vërehet një prani më e madhe tymi në oxhakun e objektit, një dukuri që parashikohet të vazhdojë për rreth tri deri në katër orë. “Nisja e punës është procedurë e pashmangshme teknologjike për rikthimin në funksion të njësive gjeneruese që shfrytëzojnë linjitin. Gjatë ngrohjes së kaldajës dhe stabilizimit të fazës së djegies, emetimet nga oxhaku mund të shfaqen përkohësisht më të theksuara”, thuhet në komunikatën e KEK-ut. Lidhur me këtë situatë, korporata u ka bërë thirrje për durim banorëve të Obiliqit dhe rrethinës, duke pranuar se pamja e tymit mund të krijojë shqetësim për komunitetin lokal. “KEK është e ndërgjegjshme për shqetësimin e mundshëm dhe kërkon mirëkuptimin e qytetarëve të komunës së Obiliqit dhe zonave përreth gjatë kësaj kohe”, shtohet tutje në njoftim. Pasi të përmbyllen të gjitha hapat teknikë, njësia A4 pritet të kyçet në sistemin energjetik të vendit dhe të vazhdojë prodhimin në mënyrë të rregullt. Megjithatë, në njoftimin e lëshuar nga KEK-u nuk janë bërë të ditura shkaqet që çuan në ndalimin e mëparshëm të punës për këtë njësi.