Kritikat e rënda në Brazil e prekin Raphinhan: Dua të jem gati si për kombëtaren, ashtu edhe për Barcelonën

Sulmuesi i Barcelonës, Raphinha, ka thyer heshtjen përballë valës së kritikave që e shoqëruan në vendin e tij të origjinës, pas deklaratave të bëra rreth menaxhimit të minutave me fanellën e kombëtares. Ai ka pranuar hapur se ky reagim negativ i ka shkaktuar ngarkesë emocionale, duke mohuar me vendosmëri çdo aludim se ka dashur ndonjëherë të vërë në pikëpyetje angazhimin e tij ndaj Seleçaos. Futbollisti i katalanasve u shfaq para mediave në një konferencë për shtyp, ku krah tij ishte edhe Carlo Ancelotti, në kuadër të përgatitjeve për ndeshjen miqësore kundër Japonisë që do të luhet të shtunën në Singapor. Gjatë kësaj daljeje publike, ylli brazilian u përfshi nga emocionet teksa sqaronte fjalët e tij të thëna menjëherë pas arritjes së marrëveshjes për rinovimin e kontratës me klubin spanjoll deri në vitin 2030. Në atë periudhë, Raphinha kishte bërë të ditur se kishte diskutuar me Ancelottin për një shpërndarje më të kujdesshme të minutave në fushë, me qëllim që të shmangte përsëritjen e ndonjë dëmtimi të mundshëm, pasi kishte kaluar një kalvar të vështirë me probleme të njëpasnjëshme fizike. "Kisha menduar se po tregohesha i qartë kur m’u bë pyetja dhe u përgjigja. Të paktën në mendjen time, më dukej se isha shprehur qartë. Duke pasur parasysh gjithçka që kam kaluar në tri grumbullimet e fundit, me tri lëndime pothuajse në të njëjtën pjesë të këmbës, ajo që doja të thosha ishte thjesht se duhet të kujdesem për veten. Natyrisht, nuk dua të lëndohem përsëri. Dua të jem në dispozicion jo vetëm të kombëtares, por edhe të Barcelonës", u shpreh Raphinha. Kapiteni i skuadrës blaugrana nuk e fshehu se fshikullimet publike e kanë lënduar, veçanërisht kur u vu në diskutim integriteti i tij profesional dhe dëshira e zjarrtë për të mbrojtur ngjyrat e Brazilit. "Është e natyrshme që kritikat të na prekin. Jemi njerëz dhe, sado që të përpiqemi, disa gjëra ndikojnë tek ne. Kushdo në vendin tim, duke marrë kritika edhe pse e di se po jep gjithçka nga vetja, do të ndihej i prekur. Duhet të jemi të përgatitur për kritikat, sepse të përfaqësosh Brazilin është diçka shumë e madhe", shtoi ai. Më tej, lojtari bëri të qartë se nuk do të insistojë kurrë me forcë që të jetë në fushë nëse kushtet fizike nuk ia lejojnë të kontribuojë në maksimum, duke garantuar se do të jetë ai vetë i pari që do të kërkojë largimin në rast se nuk ndihet në gjendjen e duhur për skuadrën. "Fatkeqësisht, kur nuk jemi mirë fizikisht, nuk mund të luajmë as këtu dhe as në klub. Nëse trupi ma mundëson, gjithmonë do të jap më të mirën. Kur ta shoh se fizikisht nuk mund të paraqitem në nivelin e duhur, do të jem i pari që do të tërhiqem, sepse jam shumë kritik ndaj vetes. Ajo që thashë pati jehonë negative, megjithëse në atë moment mendoja se e kisha shpjeguar mirë. Por, fatkeqësisht, kjo është pjesë e futbollit", deklaroi braziliani, i cili aktualisht mbajë primatin e golashënuesit më të mirë në La Liga me 15 realizime. Në fjalën e tij, sulmuesi solli në vëmendje edhe momentet e rënda që kishte kaluar me dëmtimet gjatë Kampionatit Botëror, duke pranuar se nuk kishte mundur dot të shfaqte formën e tij më të mirë në fushë. "Ishte veçanërisht zhgënjyese. Ishte një moment shumë i rëndësishëm në jetën time dhe për kombëtaren, por fizikisht nuk ndihesha në 100 për qind të mundësive. Pas lëndimit ndaj Francës, gjatë grumbullimit para Kupës së Botës, luajta vetëm dy ndeshje me Barcelonën. Kur je në fushë, nuk mendon për shqetësimet fizike, por dëshiron të japësh më të mirën. Unë gjithmonë jap 100 për qind. Shpeshherë mjekët dhe fizioterapeutët më kërkojnë të jem më i kujdesshëm, por nuk mund ta ndryshoj stilin tim të lojës. Megjithatë, trupi e paguan këtë dhe ka nevojë për kohë për t’u rikuperuar. Ishte zhgënjyese", përfundoi rrëfimin e tij sulmuesi. Në mbyllje të prononcimit, Raphinha ritheksoi se të veshësh fanellën e Brazilit mbetet një nder i jashtëzakonshëm dhe një privilegj i madh, duke hedhur poshtë në mënyrë kategorike çdo pretendim se ka pasur ndonjëherë në mendje idenë e dorëheqjes nga përfaqësuesja.