De la Fuente jep lajmin e madh: Lamine Yamal dhe Mikel Merino gati për sfidën ndaj Anglisë

Pas triumfit kundër Republikës Çeke, trajneri i Kombëtares së Spanjës, Luis de la Fuente, ka analizuar ecurinë e skuadrës së tij, formën e lojtarëve dhe sfidën e radhës që e pret “La Rojan”. Në një deklaratë dhënë për televizionin spanjoll TVE, De la Fuente pranoi se ekipi i tij vuajti për ta vënë ndeshjen nën kontroll, veçanërisht para se të realizohej goli i dytë. “Ashtu siç kishim llogaritur, patëm përballë një kundërshtar agresiv, i cili përmes goditjeve standarde dhe forcës fizike provokoi tensione në fushë. Gjithsesi, raste për gol nuk pati, pasi Unai Simón nuk u vu në provë. Ne shpërdoruam raste që zakonisht i shfrytëzojmë. Jam i kënaqur, sepse ndeshja e parë pas një pauze të gjatë pa u bashkuar nuk është e thjeshtë. Ata përfitonin nga hapësirat që linim afër zonës sonë për të rrezikuar në kundërsulm. Sikur të kishim shënuar më parë, situata do të ishte më e qetë. Qetësia erdhi vetëm pas golit të dytë”, u shpreh ai. Tekniku spanjoll dha gjithashtu përditësime inkurajuese rreth gjendjes shëndetësore të Lamine Yamalit dhe Mikel Merinos, duke konfirmuar zyrtarisht se dyshja do t'i bashkohet grupit. “Kemi lajme shumë pozitive. Lamine Yamal ndjehet i shkëlqyer dhe ka vullnet të jashtëzakonshëm që nesër t'i bashkohet skuadrës. E njëjta vlen edhe për Mikelin. Njëri prej tyre do të mbërrijë në mesditë, ndërsa tjetri pak më vonë, por të dy nesër do të jenë me ne”, tha De la Fuente. Sipas tij, dy futbollistët gëzojnë formë optimale fizike dhe janë plotësisht të gatshëm për të përballuar një ndeshje të plotë prej 90 minutash. Në fund të prononcimit të tij, kreu i stafit teknik të Spanjës komentoi duelin e ardhshëm, duke e krahasuar atë me një finale të madhe të Kampionatit Botëror ose Evropian. “Duke e pasur parasysh kualitetin e të dy kombëtareve, e dinim se kjo përballje ka përmasat e një finaleje të Botërorit apo Evropianit. Secila palë ka potencialin për të marrë një rezultat pozitiv. Është një mundësi e artë për të shijuar dy nga përfaqësueset më elitare në planet. Synimi ynë është të ruajmë këtë ritëm dhe këtë ecuri fituese”, përfundoi ai.