Shqipëria me mot të paqëndrueshëm të premten, priten reshje shiu dhe shtrëngata

Ditën e premte, Shqipëria do të ndikohet nga kushte atmosferike të paqëndrueshme, me vranësira mesatare deri të dendura në të gjithë territorin. Sipas parashikimit meteorologjik, reshjet e shiut do të nisin që në orët e para të 24-orëshit, me intensitet të ulët. Në zonat veriperëndimore, reshjet pritet të jenë me intensitet deri mesatar, në formën e shtrëngatave, të shoqëruara me shkarkesa elektrike. Era do të fryjë kryesisht nga drejtimi jugor, me një shpejtësi mesatare prej 10 m/s. Përgjatë vijës bregdetare dhe në lugina, ajo pritet të arrijë shpejtësi deri në 25 m/s. Ndërkohë, në det parashikohet valëzim me forcë 4 deri në 6 ballë.