Kosova përballet me ndryshim drastik të motit: Pas temperaturave të ngrohta, vijnë rrebeshe shiu dhe erëra të forta

Dita e sotme në Kosovë karakterizohet nga temperatura relativisht të larta për stinën, megjithatë, vendi ynë po hyn në një fazë të destabilizimit atmosferik. Afrimi i një qendre ciklonike në rajonin e Ballkanit do të sjellë intensifikim të erërave jugore, të cilat do të ndjehen ndjeshëm gjatë orëve në vijim. Gjatë orëve të ditës, qielli do të jetë i ndryshueshëm, me alternime mes vranësirave dhe intervaleve me diell. Në pjesët perëndimore, veriperëndimore dhe veriore të territorit, parashikohen rrebeshe shiu të herëpashershme. Ndërkohë, në zonat lindore dhe juglindore, moti do të mbetet më i ngrohtë dhe me diell, ndonëse i shoqëruar nga erëra të fuqishme nga drejtimi i jugut dhe juglindjes. Erërat më intensive pritet të godasin zonat malore, ndërsa në rajonet e tjera intensiteti i tyre do të jetë i ndryshueshëm. Në orët e mbrëmjes dhe gjatë natës, moti do të përkeqësohet ndjeshëm, pasi reshje të fuqishme shiu do të përfshijnë pjesën më të madhe të Republikës së Kosovës. Në disa zona, shiu do të jetë intensiv dhe i shoqëruar me shkarkesa rrufesh e bubullima. Me depërtimin e një fronti të ftohtë ajror, drejtimi i erës do të ndryshojë duke fryrë nga veriu, fillimisht me forcë, për t'u dobësuar gradualisht më pas. Ndërkaq, në viset kodrinore-malore, reshjet e shiut do të shndërrohen në reshje bore dhe shqote.