Mancini: Franca mund të na shënonte shumë gola, por ne reaguam si skuadër e madhe

Përzgjedhësi i Italisë, Roberto Mancini, ka qenë tejet i kënaqur me paraqitjen e skuadrës së tij në fitoren 3:1 ndaj Francës, në ndeshjen e vlefshme për Ligën A të Ligës së Kombeve. Trajneri italian vlerësoi reagimin e futbollistëve pas gabimit të portierit Gianluigi Donnarumma, i cili i mundësoi Francës të kalonte në epërsi që në minutën e 10-të. “Paraqitje e madhe, ishim fantastikë dhe jam shumë i lumtur për futbollistët, por edhe për tifozët që ishin sonte në stadium. Shpresoj që të jenë kënaqur”, deklaroi Mancini pas ndeshjes, transmeton media italiane “La Gazzetta dello Sport”. Ai u ndal edhe te gabimi i Donnarummës, duke theksuar se skuadra nuk e humbi qetësinë, pavarësisht golit të hershëm të pësuar. “Fatkeqësisht, ishte një gabim. Gjëra të tilla ndodhin, edhe pse nuk duhet të ndodhin. Megjithatë, ne qëndruam të qetë, nuk u nervozuam dhe vazhduam të luanim futboll. Në fund, e merituam plotësisht fitoren”,u shpreh trajneri italian. Mancini theksoi se reagimi i skuadrës ishte veçanërisht i rëndësishëm, pasi Franca mund ta kishte shfrytëzuar momentin për ta thelluar epërsinë. “Pas golit 0:1, ndeshja mund të kishte përfunduar edhe me një fitore të thellë të Francës. Për shtatë minuta vuajtëm pak, por më pas rifilluam të luanim dhe treguam qetësi. Më pëlqeu gjithçka sonte”, deklaroi ai.Megjithatë, përzgjedhësi italian paralajmëroi se puna nuk ka përfunduar dhe se skuadrën e pret një tjetër sfidë e rëndësishme. “Kjo fitore ka rëndësi deri në një pikë, sepse tani duhet të shkojmë në Belgjikë dhe të marrim një rezultat pozitiv. Jam shumë i lumtur, por kemi ende shumë punë për të bërë”, përfundoi Mancini.