Kane vendos rekordin historik në Wembley dhe i dhuron fitoren Anglisë ndaj Kroacisë

Anglia ka siguruar kualifikimin në çerekfinale të Ligës së Kombeve, pasi ka mposhtur Kroacinë me rezultat 2-1 në stadiumin “Wembley”, në një mbrëmje të veçantë për kapitenin Harry Kane. Sulmuesi anglez ishte protagonist i kësaj fitoreje, duke shënuar golin vendimtar, në një ndeshje që kishte edhe një rëndësi të veçantë personale për të. Para fillimit të takimit, Kane ngriti lart në qiellin e “Wembley”-t trofeun e Topit të Artë, ndërsa u bë futbollisti me më së shumti paraqitje në historinë e Kombëtares së Anglisë, duke regjistruar ndeshjen e 126-të. Ai e kaloi kështu legjendën Peter Shilton, me të cilin deri atëherë ndante rekordin prej 125 paraqitjesh. Sa i përket ndeshjes, Anglia kaloi në epërsi në minutën e 24-të, kur Morgan Rogers realizoi pas një aksioni të bukur të nisur nga Harry Kane dhe të vazhduar nga Jude Bellingham. Kroacia arriti të barazonte shifrat në minutën e 59-të, kur Petar Sucic përfitoi nga një gabim i Jarell Quansah për të shënuar për 1-1. Megjithatë, vetëm pesë minuta më vonë, Kane u bë përsëri protagonist, duke shënuar nga pika e bardhë për rezultatin 2-1. Penalltia u akordua pas ndërhyrjes së VAR-it, për një tërheqje të Ivan Smolcicit ndaj Quansah. Në vazhdim, Kroacia u përpoq të rikthehej në lojë, ndërsa hyrja e Luka Modricit në minutën e 76-të i dha më shumë gjallëri skuadrës mysafire. Megjithatë, anglezët arritën ta ruanin epërsinë deri në fund.