Muçi shijon momentin më të mirë me Shqipërinë: Kam kaluar shumë për të arritur këtu

Ernest Muçi po kalon një nga periudhat më të mira që nga momenti kur nisi të përfaqësojë Kombëtaren e Shqipërisë. Sulmuesi kuqezi ishte një nga protagonistët kryesorë në fitoren 2-0 ndaj Finlandës, duke realizuar golin e parë të ndeshjes dhe duke konfirmuar formën e mirë që po kalon. Pas ndeshjes, Muçi ka folur për momentin që po përjeton me fanellën e Kombëtares, duke pranuar se aktualisht ndihet më i vlerësuar dhe më i besuar nga trajneri, bashkëlojtarët dhe tifozët. Ai nuk ka harruar as vështirësitë dhe sakrificat që i është dashur të kalojë për të arritur deri në këtë pikë të karrierës. “Momenti më i mirë në Kombëtare? Po, ky është momenti kur ndiej besimin e shokëve të ekipit, trajnerit dhe tifozëve. Kam kaluar shumë për të arritur këtu”, u shpreh Muçi. Sulmuesi shqiptar vlerësoi edhe paraqitjen e përgjithshme të ekipit, duke e cilësuar fitoren ndaj Finlandës si një nga ndeshjet më të mira të Shqipërisë.