Valë e re sulmesh ruse në Ukrainë: Goditen anijet e mallrave në Detin e Zi dhe qendrat e të dhënave në Kiev

Forcat ruse kanë ndërmarrë një sulm të gjerë gjatë natës, duke vënë në shënjestër kryeqytetin ukrainas dhe disa rajone të tjera të vendit. Incidentet kanë shkaktuar dëme materiale në infrastrukturën kritike dhe civile. Sipas deklaratave të Presidentit Volodymyr Zelensky të bëra të martën, dy anije që mbanin flamuj të huaj janë goditur në rajonin e Odesës, në Detin e Zi. Përveç kësaj, kreu i shtetit ukrainas konfirmoi se sulmet goditën edhe objekte të rëndësishme energjetike, nënstacione, biznese civile, si dhe ndërtesa banimi, ndërsa Kievi dhe dhjetë rajone të tjera u përfshinë nga goditjet gjatë natës. Nga ana tjetër, Ministria ruse e Mbrojtjes ka konfirmuar operacionet e ndërmarra gjatë natës, duke pretenduar se janë goditur dy anije transporti në Detin e Zi, si dhe dy qendra të të dhënave të vendosura në qytetin e Kievit.