Dita e Mbretit të Belgjikës, Presidentja Shiroka Pula vlerëson lart mbështetjen historike ndaj Kosovës

Presidentja e Republikës së Kosovës, Justina Shiroka Pula, ka marrë pjesë në mbrëmjen solemne të organizuar nga Ambasada e Belgjikës në Prishtinë, me rastin e shënimit të Ditës së Mbretit të këtij shteti. Gjatë fjalimit të saj para të pranishmëve, Presidentja Shiroka Pula ka theksuar se Belgjika përfaqëson një aleat të palëkundur të Kosovës, duke qenë përkrah popullit tonë në epokat më sfiduese të historisë së re. E para e shtetit nënvizoi se mirënjohja e Kosovës ndaj Belgjikës është e përhershme, veçanërisht për solidaritetin e treguar gjatë periudhës së luftës 1998–1999. Ajo veçoi qëndrimin parimor të këtij shteti në mbështetje të ndërhyrjes së NATO-s, e cila ishte vendimtare për shpëtimin e jetëve dhe mbrojtjen e dinjitetit njerëzor, duke shtuar se ky gjest mbetet i skalitur thellë në kujtesën tonë kolektive. Në vijim të fjalës së saj, Presidentja Shiroka Pula vlerësoi kontributin e vazhdueshëm të Belgjikës që nga shpallja e pavarësisë, duke e mbështetur fuqishëm procesin e shtetndërtimit, zhvillimin demokratik dhe aspiratat euroatlantike të Kosovës. Ajo theksoi se marrëdhëniet dypalëshe po njohin rritje të vazhdueshme, ku një rol kyç si urë lidhëse luan mërgata jonë në Belgjikë. Në përmbyllje, Presidentja Shiroka Pula shprehu optimizmin për forcimin e mëtejshëm të partneritetit, duke vënë në pah potencialin e lartë për bashkëpunim të shtuar në sferat ekonomike, arsimore, kulturore dhe institucionale mes dy vendeve.