Kolaps në shërbimet e Microsoft: Outlook dhe platformat e tjera përballen me ndërprerje globale

Përdoruesit e platformës së njohur të komunikimit, Microsoft Outlook, janë përballur me probleme të mëdha teknike, duke e bërë të pamundur dërgimin ose marrjen e postës elektronike. Gjatë përpjekjeve për të aksesuar shërbimin, përdoruesit janë përballur me njoftimin e gabimit “Something went wrong”. Çrregullimet në sistem kanë nisur rreth orës 18:30, ndërsa dyshohet se shkaktari është një defekt në infrastrukturën e serverëve të Microsoft. Mesazhi specifik i gabimit “502, Bad Gateway” tregon se shërbimi nuk po arrin të sinkronizohet siç duhet me sistemin Azure Front Door. Problematikat nuk janë kufizuar vetëm te Outlook, por janë shtrirë edhe në shërbime të tjera të paketës Microsoft 365. Mjete thelbësore për punën e përditshme, si Teams dhe Copilot, kanë rezultuar të paaksesueshme për mijëra profesionistë në mbarë botën. Në një reagim zyrtar, gjiganti teknologjik Microsoft e ka konfirmuar incidentin. “Jemi duke punuar për të minimizuar ndikimin dhe kemi verifikuar se çrregullimet prekin lidhjen me Microsoft 365 për përdoruesit në çdo rajon të globit. Përditësime të mëtejshme do të publikohen në Qendrën e Administrimit të Microsoft 365, nën referencën EX1550543”, thuhet në njoftimin e kompanisë.