Strategjia e Sylvinhos ndaj Finlandës, ish-mbrojtësi Ardit Beqiri zbardh planin e kuqezinjve

Ish-mbrojtësi i krahut të majtë të Kombëtares shqiptare, Ardit Beqiri, ka analizuar përballjen e Ligës së Kombeve mes Shqipërisë dhe Finlandës. Në një intervistë për emisionin “Kubi Sportiv” në Euronews Albania, ai ka ndarë pikëpamjet e tij mbi mënyrën se si tekniku kuqezi ka përgatitur këtë sfidë vendimtare. Sipas Beqirit, trajneri Sylvinho ka ndërtuar një qasje taktike që merr parasysh edhe gjendjen psikologjike të kundërshtarit, duke pasur parasysh se finlandezët do të kënaqeshin edhe me një barazim. Në këtë kontekst, ai pret që Shqipëria të kërkojë fitoren përmes një loje sulmuese, por pa cenuar strukturën defensive. “Pres një skuadër që do të marrë iniciativën, por gjithmonë me ekuilibër. Objektivi është të shfaqemi agresivë në fazën ofensive, duke mos lënë hapësira të pambuluara në prapavijë. Besoj se përgatitjet e stafit teknik janë të mirëstudiuara dhe zgjedhjet e bëra janë ato të duhurat për ta përballuar këtë ndeshje me kujdesin e nevojshëm”, deklaroi Beqiri.