Besnikëri afatgjatë: Lionel Scaloni konfirmohet në krye të Argjentinës deri në vitin 2030

Federata e Futbollit të Argjentinës (AFA) ka zyrtarizuar vazhdimin e bashkëpunimit me strategun Lionel Scaloni, i cili do të udhëheqë kombëtaren e këtij vendi deri në vitin 2030. Njoftimi erdhi në një moment festiv, pak para përballjes miqësore që Argjentina do ta zhvillojë kundër Uruguait në stadiumin ikonik “La Bombonera”, të shtunën në orën 01:00 (sipas kohës sonë). Presidenti i AFA-së, Claudio Tapia, e vlerësoi këtë zhvillim si një ndër momentet më kyçe për të ardhmen e futbollit argjentinas. “Është një ditë e veçantë. Kemi vendosur të zyrtarizojmë vazhdimësinë e stafit teknik me Lionel Scalonin për periudhën 2027-2030. Për mua, ky është një projekt që po hyn në vitin e tetë dhe do të zgjasë edhe katër të tjera. Scaloni do të hyjë në histori si trajneri me tri pjesëmarrje në Kupat e Botës, duke dëshmuar vlerën e projektit tonë”, u shpreh Tapia. Sipas detajeve të bëra të ditura, marrëveshja e re është ndërtuar mbi një formulë fleksibël “2+2”. Faza e parë mbulon periudhën deri në Kupën e Amerikës 2027, ndërsa përfshin edhe një klauzolë largimi nëse trajneri ndien se i mungon energjia apo motivimi për të vijuar. Faza e dytë do të aktivizohet për të garantuar prezencën e tij në stolin e Argjentinës deri në Kupën e Botës 2030. Ndryshimet në stafin teknik janë minimale, megjithatë është konfirmuar largimi i Walter Samuelit, i cili synon të ndjekë një karrierë të pavarur si trajner në futbollin evropian. Pjesa tjetër e bashkëpunëtorëve të ngushtë, si Pablo Aimar, Roberto Ayala, Luis Martín, Martín Tocalli dhe Matías Manna, do të mbeten pjesë e projektit të Scalonit. Lionel Scaloni e nisi rrugëtimin e tij me Argjentinën më 7 shtator 2018, fillimisht si zgjidhje e përkohshme, për t’u konfirmuar si trajner kryesor në nëntor të po atij viti. Nën drejtimin e tij, kombëtarja argjentinase ka shkëlqyer duke fituar katër trofe prestigjiozë: Kupën e Botës 2022, dy tituj të Copa América (2021 dhe 2024) si dhe trofeun e Finalissima-s në vitin 2022.