Vrasja makabre në Austri: 47-vjeçari kosovar vrau gruan e tij, pretendonte se ajo merrej me magji të zeza

Një tragjedi e rëndë që tronditi opinionin publik në Austri gjatë festës së Pashkëve, kur një 38-vjeçare, nënë e katër fëmijëve, u ekzekutua në komunën Sooß të Austrisë së Poshtme, pritet të marrë një epilog gjyqësor në muajin nëntor. Në bankën e të akuzuarve do të ulet bashkëshorti i viktimës, një 47-vjeçar nga Kosova, së bashku me një 45-vjeçar tjetër, gjithashtu me prejardhje nga Kosova, i cili akuzohet për trafikim armësh dhe bashkëpunim në vrasje. Sipas hetimeve, 45-vjeçari dyshohet se i ka siguruar armën 47-vjeçarit, duke qenë në dijeni të plotë për qëllimin e këtij të fundit për t'i dhënë fund jetës së gruas së tij. Për shkak të këtij implikimi, ai përballet me rrezikun e dënimit me burgim të përjetshëm. Ngjarja ndodhi më 5 prill, ditën e Pashkëve, kur autori kishte shkuar për ta takuar viktimën, me të cilën ishte në proces ndarjeje, gjoja për t'i dhuruar dhurata. Aktakuza përshkruan një skenar horror: 47-vjeçari dyshohet se e qëlloi gruan tri herë me një pistoletë 'Beretta', e më pas e goditi rreth 40 herë me kaçavidë në pjesën e sipërme të trupit derisa ajo ndërroi jetë. Më pas, ai e tërhoqi trupin e pajetë drejt kopshtit, duke u përpjekur ta fshehë nën mbeturina. Pas këtij krimi mizor, komuniteti në Austri organizoi një fushatë solidariteti për katër fëmijët e mbetur jetimë, duke mbledhur 4 mijë euro ndihmë për ta. Në anën tjetër, mbrojtja e 45-vjeçarit, e përfaqësuar nga avokati Mirsad Musliu, i ka hedhur poshtë kategorikisht akuzat. Avokati pretendon se klienti i tij nuk ka pasur asnjë rol në vrasje dhe se shitja e armës për 900 euro, për të cilën flet aktakuza, nuk ka ndodhur asnjëherë në kontekstin e krimit, duke shtuar se klienti i tij thjesht kishte tentuar ta shiste pistoletën te një person tjetër. Një zhvillim i ri në këtë proces është ekspertiza psikiatrike e 47-vjeçarit, e cila sugjeron se ai vuan nga një gjendje psikotike dhe është penalisht i papërgjegjshëm. Gjatë mbajtjes në paraburgim, ai ka shfaqur shenja të çrregullimeve të rënda, duke pretenduar vazhdimisht se bashkëshortja e tij ishte shtrigë që merrej me magji të zezë dhe se demonët e rrethonin. Duhet theksuar se autori nuk është një emër i panjohur për drejtësinë, pasi më parë ka vuajtur 16 vjet burgim për një sulm me armë zjarri ndaj një punonjësi të sigurimit në një lokal nate. Vendimi përfundimtar pritet të merret në mesin e nëntorit nga Gjykata Rajonale e Wiener Neustadt. Deri në shpalljen e vendimit nga trupi gjykues, të dy të akuzuarit gëzojnë prezumimin e pafajësisë.