Tragjedi në Turqi: Helikopteri ushtarak përplaset në Malatya, katër ushtarakë humbin jetën

Një ngjarje e rëndë ka tronditur Turqinë, ku një helikopter ushtarak i modelit S-70 është rrëzuar në rajonin e Malatyas, duke shkaktuar humbjen tragjike të jetës së katër ushtarëve që ndodheshin në bord. Lajmi është bërë i ditur zyrtarisht nga Ministria e Mbrojtjes Kombëtare e Turqisë. Sipas autoriteteve, shkaqet që çuan në këtë aksident fatal mbeten ende të paqarta, ndërsa hetimet për zbardhjen e rrethanave janë në zhvillim e sipër. Në njoftimin e ministrisë thuhet se menjëherë pas marrjes së sinjalit, ekipet e emergjencës janë dislokuar në zonën e rrëzimit për të ndërmarrë operacionet e kërkim-shpëtimit. Pas përplasjes, në vendin e ngjarjes ka shpërthyer një zjarr i fuqishëm, i cili për shkak të rrethanave është përhapur edhe në një banesë që ndodhej në afërsi të zonës ku u rrëzua mjeti fluturues.