Ekzekutimi në Spanjë: Kush ishte Luka Beqiraj dhe lidhjet e tij me rrjetet e trafikut të armëve e drogës

Vrasja e 39-vjeçarit shqiptar, Luka Beqiraj, në një kompleks sportiv në Orihuela Costa të Spanjës, ka rikthyer vëmendjen te e kaluara e errët e viktimës. I njohur në qarqet kriminale me pseudonimin “Kriols”, Beqiraj u ekzekutua me armë zjarri të martën, ndërsa autori i krimit u largua me shpejtësi nga vendngjarja në zonën e Playa Flamenca, duke lënë pas një hetim kompleks për autoritetet spanjolle. Hetuesit e Gardës Civile spanjolle po punojnë intensivisht për zbardhjen e motiveve të kësaj vrasjeje. Pista kryesore mbetet ajo e larjes së hesapeve ose e konflikteve të vjetra që rrjedhin nga aktiviteti i mëparshëm kriminal i viktimës, i cili kishte lidhje të dokumentuara me organizata të fuqishme kriminale shqiptaro-italiane, të specializuara në trafikun ndërkombëtar të lëndëve narkotike, armëve dhe municioneve luftarake. Luka Beqiraj, i lindur në Vlorë në vitin 1987, kishte një histori të gjatë përplasjesh me ligjin. Në vitin 2016, ai u arrestua në Shqipëri pas një sulmi të dhunshëm që la një person me plagë të rënda. Megjithatë, aktiviteti i tij më i bujshëm ndërkombëtar u shënua në vitin 2019, kur ai u prangos në Itali gjatë operacionit të gjerë të koduar “Lulet e Pranverës”. Në atë aksion, ku morën pjesë mbi 100 efektivë të Policisë Financiare italiane, u arrestuan 27 persona, mes të cilëve 21 ishin shtetas shqiptarë, përfshirë edhe Beqirajn. Grupi kriminal ku bënte pjesë Beqiraj operonte me baza të forta në provincën e Leçes, por shtrinte ndikimin e tij në shumë rajone të tjera të Italisë, si Kalabria, Toskana, Sicilia, Emilia-Romanja, Liguria dhe Lombardia. Akuzat ndaj anëtarëve të këtij rrjeti përfshinin trafikun e drogës dhe futjen e paligjshme të armëve të rënda në territorin italian. Rajoni i Costa Blanca në Spanjë, ku ndodhi ngjarja, shpeshherë është identifikuar si një strehë për individë me precedentë kriminalë. Sipas ekspertëve, infrastruktura e zhvilluar, aeroportet dhe portet e kësaj zone shfrytëzohen nga rrjetet ndërkombëtare për logjistikë dhe fshehje. Megjithatë, ky rajon nuk ofron siguri nga hakmarrjet e grupeve rivale. Duke komentuar rastin, José Luis Gil, përfaqësues i Shoqatës Evropiane të Analistëve të Inteligjencës Kriminale (EACA), thekson se vrasjet e kryera në vende publike shpesh mbartin një mesazh të koduar. Sipas tij, këto akte dhune mund të përdoren nga organizatat kriminale si mjet për të ruajtur disiplinën e brendshme, për të shlyer detyrime të prapambetura ose për të dërguar sinjale kërcënuese ndaj rivalëve në tregun e zi.