Putin u thotë të dërguarve të Trumpit: Trupat evropiane në Ukrainë do të jenë shënjestër

Presidenti rus,Vladimir Putin, priti të enjten në Kremlin të dërguarit e presidentit amerikan Donald Trump,Steve WitkoffdheJared Kushner, një ditë pas përfundimit të bisedimeve trepalëshe SHBA-Rusi-Ukrainë në Abu Dhabi. Bisedimet sollën marrëveshjen për shkëmbimin më të madh të robërve të luftës, por jo një përparim drejt paqes. Takimi në Pallatin e Senatit të Kremlinit zgjati rreth dy orë. Në të morën pjesë edhe këshilltari i Putinit për politikë të jashtme, Juri Ushakov, dhe i dërguari i tij për investime, Kirill Dmitriev. Washingtoni kërkon evropianët në tryezë Witkoff shprehu shpresën që pas takimit të shpallet një raund i ri bisedimesh trepalëshe, ku do të marrin pjesë edhe vendet evropiane. "Shpresojmë që, pas bisedimeve me Putinin, do të jetë e mundur të shpallim një raund të ri negociatash trepalëshe, në të cilat do të marrin pjesë edhe evropianët", tha Witkoff. Kushner, dhëndri i presidentit Trump, i përcolli Putinit mesazhin se aleatët evropianë të Kievit kanë dëshirë të fortë që lufta të marrë fund dhe të pasohet nga një paqe e gjatë. Putin: Trupat e huaja do të jenë shënjestër Putin tha se Rusia nuk ka qenë kurrë kundër dialogut me Evropën, por paralajmëroi ashpër kundër çdo pranie ushtarake të huaj në Ukrainë. "Mundësia e pranisë së trupave të huaja në Ukrainë përbën një kërcënim për sigurinë kombëtare të Rusisë", tha ai, duke shtuar se këto forca do të konsideroheshin objektiva legjitime për ushtrinë ruse. "Ne do të donim që amerikanët të bashkëpunonin me evropianët për të vendosur se çfarë duan, paqe apo luftë", shtoi kreu i Kremlinit. Për çështjen territoriale, që mbetet pengesa kryesore për marrëveshjen, Putin përsëriti se për Rusinë ekziston vetëm një vijë ndarëse me Ukrainën, kufiri shtetëror. Kjo është një aluzion për pretendimet ruse ndaj katër rajoneve ukrainase që Moska i aneksoi në vitin 2022, por që nuk i ka pushtuar plotësisht. Ai propozoi gjithashtu një mision humanitar në qytetin e Kostjantinivkës, ku sipas tij kanë mbetur 400 deri në 500 civilë. Shkëmbimi më i madh i robërve Bisedimet dy-ditore në Abu Dhabi, të ndërmjetësuara nga SHBA-ja, ishin të parat e këtij lloji që nga shkurti. Rezultati kryesor ishte marrëveshja për shkëmbimin e robërve, që sipas Kushnerit do të jetë më i madhi i kësaj lufte. "Arritëm një përparim të rëndësishëm humanitar, me Ukrainën dhe Rusinë që u pajtuan në parim për atë që do të jetë shkëmbimi më i madh i robërve të luftës. Kjo do t'i ribashkojë familjet, do të ndërtojë besim dhe do të krijojë vrull drejt paqes", shkroi Kushner në rrjetin X. Shkëmbimin e konfirmuan edhe kreu i delegacionit rus, Vladimir Medinsky, dhe ai i delegacionit ukrainas, Rustem Umerov. Medinsky theksoi se marrëveshja është "në parim". Kushner pranoi se mes palëve "nuk ka besim për momentin". Zelensky: Nuk lëshojmë territor Presidenti ukrainas,Volodymyr Zelensky, e mirëpriti shkëmbimin e robërve si hap pozitiv, por përsëriti se Ukraina nuk do t'i pranojë kërkesat për të lëshuar territorin e pushtuar nga Rusia në këmbim të paqes. Ai u ankua edhe për kufizimin e ri të shpejtësisë së Starshield-it, versionit ushtarak të shërbimit satelitor Starlink të Elon Musk-ut, duke thënë se kjo i dëmton mbrojtjet e Ukrainës. Pas Moskës, Witkoff dhe Kushner nisen për në Dublin, ku Zelensky merr pjesë në samitin e Komunitetit Politik Evropian, për ta njoftuar për bisedimet me Putinin.