Ndërhyrje kirurgjikale jetëshpëtuese në Vushtrri: Hiqet tumori 4-kilogramësh pas dy vitesh vuajtje

Një operacion tejet kompleks është finalizuar me sukses në Spitalin “Sheikh Zayed” në Vushtrri, ku një paciente i është nënshtruar heqjes së një mase tumorale me peshë prej katër kilogramësh. Ndërhyrja, e cila i dha fund një kalvari dyvjeçar të pacientes me këtë problem shëndetësor, u krye nga një ekip i specializuar mjekësor. Sipas informacioneve të bëra publike nga ky institucion shëndetësor, pacientja paraqitej në gjendje të rëndë shëndetësore para operacionit. Megjithatë, pas ndërhyrjes së suksesshme, gjendja e saj aktualisht është stabile dhe ajo ndodhet jashtë rrezikut për jetën. Ekipi mjekësor që realizoi këtë operacion të vështirë udhëhiqej nga gjinekologu obstetër Mr. sc. Dr. Blerim Feka, i mbështetur nga gjinekologet obstetre Dr. Fatmire Melenica dhe Dr. Behije Ejupi, ndërsa për anestezinë u përkujdes Dr. Rexhep Kovaçi. Drejtuesit e spitalit e vlerësuan këtë arritje si dëshmi të angazhimit maksimal dhe profesionalizmit të lartë që karakterizon stafin e tyre. Nga ana tjetër, Dr. Blerim Feka ka shprehur falënderime për drejtorin e spitalit, duke theksuar se përkrahja e vazhdueshme dhe sigurimi i kushteve adekuate janë faktorë kyç në realizimin e operacioneve të tilla sfiduese.