Agim Ibraimi kritikues pas ndeshjes me Zvicrën: Synojmë triumfin ndaj Sllovenisë

Agimi Ibraimi gëzon një status mjaft të njohur në arenën e futbollit slloven. Aktualisht, 38-vjeçari është anëtar i Bordit Drejtues të Federatës së Futbollit të Maqedonisë (FFM), ndërsa gjatë karrierës së tij të pasur ka mbrojtur ngjyrat e katër skuadrave sllovene: Olimpias, Naftës, Mariborit dhe Domzhales. Periudhën më të lavdishme të karrierës e kaloi te Maribori, me të cilin triumfoj katër herë në kampionatin kombëtar dhe fitoi dy Kupa, krahas paraqitjeve mbresëlënëse në arenën evropiane. Një moment i paharruar mbetet goli i shënuar në nëntor të vitit 2014 kundër Chelseat në fazën e grupeve të Ligës së Kampionëve. Gjatë një interviste për platformën sllovene "SportKlub", ish-mesfushori analizoi situatën aktuale të përfaqësueses maqedonase: "Nga këndvështrimi ynë, duhet të jemi realistë. Në grupin tonë bëjnë pjesë kundërshtarë të fortë si Zvicra, Skocia dhe Sllovenia. Objektivi primar mbetet ruajtja e vendit në Ligën B të Ligës së Kombeve, kurse çdo sukses shtesë do të ishte një bonus. Kemi besim te pikët dhe fitorja ndaj Sllovenisë. Ekipi është tejet i motivuar, dhe në të kaluarën kemi regjistruar ndeshje të mira në tokën sllovene". Në lidhje me përballjen e Sllovenisë kundër Skocisë, ai theksoi ngjashmëritë mes dy vendeve. "Maqedonia dhe Sllovenia po përballen me sfida të ngjashme. Nuk po arrijmë të konsolidojmë formacionin ideal dhe kjo kërkon një analizë të thellë. Karriera nuk mund të ndërtohet vetëm përmes ndeshjeve në kombëtare; nëse mungon vazhdimësia si titullar në skuadrën tënde, është e pamundur të japësh maksimumin me përfaqësuesen. Të dyja kombëtaret kanë lojtarë që duan t'i dëshmojnë cilësitë e tyre para stafit të ri teknik. Sipas vlerësimit tim, Sllovenia nuk prodhoi rrezikshmërinë e duhur ndaj skocezëve, ndërsa dy ekipet tona nuk kanë qenë në nivelin e dëshiruar kohët e fundit", u shpreh Ibraimi. Duke komentuar atmosferën dhe ecurinë brenda kampit maqedonas, ai nuk e fshehu pakënaqësinë për paraqitjen e fundit. "Sfida kundër Zvicrës ishte tejet e zbehtë. Zviceranët zhvilluan një lojë të kontrolluar, ndërsa ne u ndëshkuam nga gabimet individuale, të cilat janë fatale përballë një kundërshtari të tillë. Megjithatë, kemi prurje të reja që do të jenë shtylla kurrizore e ekipit për dekadën e ardhshme". Ibraimi beson se trajneri do të bëjë korrigjimet e duhura para duelit me Slloveninë, duke theksuar problemin e mungesës së minutave të lojtarëve në klubet e tyre. "Kjo krijon një boshllëk në bashkëkuptimin mes lojtarëve, pasi sistemi ndryshon shpesh dhe atyre u mungon rutina. Personalisht, nuk më pëlqen tendenca e futbollit modern ku gjithçkanë varur nga statistikat dhe numrat. Çfarë rëndësie kanë të dhënat e kilometrave të vrapuara kur regjistrohen gabime trashanike? Futbolli kërkon pasion dhe atë shpirtin spontan të lojës së 'rrugës', elementë që duhen rikthyer për ta bërë sportin sërish emocionues", deklaroi ai. Në fund, ai bëri edhe një analizë taktike rreth përzgjedhjes së lojtarëve. "Mitrovski dhe Enis Bardhi janë opsione serioze për formacionin startues. Mitrovski është një 'numër 10' klasik, i talentuar dhe me një këmbë të majtë të rrezikshme, tipare që i zotëron edhe Bardhi. Nëse vendosim të luajmë me dy organizatorë, fokusi do të jetë te kontrolli i topit. Nëse Mitrovski nuk e nis nga minuta e parë, atëherë do të mbështetemi te kundërsulmet. Ai është në formë të shkëlqyer, luan rregullisht te Olimpija, ndaj pse të mos aktivizohen futbollistët që kanë minuta në këmbë?", përfundoi Agim Ibraimi.