Materazzi thyen heshtjen: Si e kujton sot goditjen legjendare të Zidane dhe takimin e fshehtë për pajtim

Marco Materazzi, ish-mbrojtësi i njohur italian, ka sjellë sërish në vëmendje një nga momentet më dramatike dhe të përfolura të futbollit botëror: goditjen me kokë që mori nga Zinedine Zidane në finalen e Kupës së Botës në vitin 2006. Në një rrëfim të sinqertë për “La Gazzetta dello Sport”, Materazzi pranoi se vdekja tragjike e futbollistit të Tenerife, Jesús de Miguel, e ka shtyrë atë të reflektojë thellë mbi rrezikun që fshihej pas atij gjesti të famshëm. “Vdekja e Jesús de Miguel më bëri ta falënderoj Zotin që nuk ndodhi më e keqja. Kur dëgjon për raste të tilla, ku një ndërhyrje në lojë përfundon në tragjedi dhe hetime për vrasje nga pakujdesia, nuk mund të mos pyesësh veten: po sikur të më kishte ndodhur mua?”, deklaroi italiani. Kujtojmë se Materazzi po i referohej humbjes së jetës së 30-vjeçarit të Tenerife, i cili ndërroi jetë më 3 nëntor pas një përplasjeje fatale me portierin e Andorrës, Jesús Owono, gjatë një ndeshjeje futbolli. Përtej reflektimit mbi sigurinë në fushë, Materazzi zbuloi edhe detaje nga përpjekja për të sheshuar konfliktin me francezin. Ai rrëfeu se në vitin 2010, në prag të takimit mes Milanit dhe Real Madridit, të dy kishin pasur një mundësi pajtimi në një hotel në Milano. Sipas ish-lojtarit italian, ai i kishte zgjatur dorën Zidane-it si shenjë paqeje. Fillimisht, francezi thuhet se ishte shprehur se “janë gjëra që ndodhin dhe i përkasin së kaluarës”, duke lënë të kuptohet se e kishte lënë pas atë episod. Megjithatë, më vonë, Zidane e mohoi publikisht se një takim i tillë kishte ndodhur ndonjëherë.