Përplasja rreth shifrave: Oda e Mjekëve demanton Kurtin për kthimin e mantelbardhëve

Shifrat e prezantuara nga kryeministri Albin Kurti lidhur me kthimin e mjekëve në Kosovë janë vënë në pikëpyetje nga Oda e Mjekëve të Kosovës (OMK). Ndërsa kreu i ekzekutivit deklaroi se gjatë vitit të kaluar janë kthyer 171 mjekë në vend, të dhënat zyrtare të OMK-së ofrojnë një pasqyrë krejtësisht tjetër, duke theksuar se në tetë vitet e fundit janë ri-anëtarësuar vetëm 40 mjekë që kishin ushtruar profesionin jashtë vendit. Sipas Odës së Mjekëve, gjatë periudhës 2018–2026, janë evidentuar rreth 40 mjekë që janë pajisur me Certifikatën e së Kaluarës Etike dhe Profesionale pasi janë kthyer në Kosovë dhe janë rilicencuar. Megjithatë, OMK nënvizon se pjesa dërrmuese e këtyre mjekëve aktualisht janë të angazhuar në sektorin privat. Për diferencën e madhe në shifra, OMK sugjeron që të kërkohen sqarime nga Ministria e Shëndetësisë, duke lënë të kuptohet se mund të bëhet fjalë për mjekë me shtetësi të huaj të licencuar nga ky dikaster. Trendi i largimit të stafit mjekësor mbetet shqetësues, me 1181 mjekë që kanë kërkuar Certifikatën e së Kaluarës Etike dhe Profesionale brenda tetë viteve të fundit, dokument ky që shërben si kusht për punësim jashtë vendit. Bazuar në të dhënat e OMK-së, rreth 600 mjekë kosovarë janë aktualisht të punësuar në Gjermani, ndërsa në vendin tonë figurojnë 521 mjekë të papunë. Në lidhje me statusin e specializantëve, Oda e Mjekëve ka sqaruar se nuk ka mjekë të papunë në këtë kategori, pasi statusi i specializantit nënkupton angazhimin e tyre të drejtpërdrejtë në procesin e avancimit profesional. Këto deklarata të kryeministrit kanë ngjallur reagime edhe në arenën politike. Deputeti i LDK-së, Armend Zemaj, i ka kërkuar qeverisë të publikojë qoftë edhe 17 emra të mjekëve specialistë që janë kthyer gjatë vitit 2025 dhe janë integruar në sistemin publik shëndetësor, duke vënë në dyshim vërtetësinë e shifrës prej 171 mjekësh të përmendur nga Kurti.