Skandal me pronat në Prishtinë: Prokuroria kërkon paraburgim për zyrtarin komunal, sekuestrohen 48 parcela milionëshe

Prokuroria Themelore në Prishtinë ka ndërmarrë veprime ligjore ndaj zyrtarit të Komunës së Prishtinës, të identifikuar me inicialet M.B., për të cilin ka kërkuar caktimin e masës së paraburgimit në kohëzgjatje prej 30 ditësh. I dyshuari është vënë në pranga nën akuzën për kryerjen e veprës penale “Keqpërdorimi i detyrës apo autoritetit zyrtar”, sipas Kodit Penal të Republikës së Kosovës. Sipas hetimeve paraprake, dyshohet se gjatë vitit 2023, M.B., në cilësinë e përgjegjësit të arkivit në Depon e Arkivit Ndërkomunal të Prishtinës, ka shpërdoruar detyrën e tij. Ai akuzohet se ka tejkaluar kompetencat ligjore dhe ka dështuar në verifikimin e vërtetësisë së dokumentacionit arkivor që kishte nën administrim. Në qendër të këtij hetimi është edhe bashkëpunimi i dyshuar me personin me inicialet N.J., i cili aktualisht ndodhet në arrati. I pandehuri M.B. dyshohet se ka ndihmuar në përdorimin e dokumenteve të falsifikuara, duke mundësuar që prona publike të transferohen në mënyrë të kundërligjshme në emër të N.J., duke i shkaktuar dëme të mëdha pasurisë shtetërore. Si pjesë e operacionit për parandalimin e tjetërsimit të mëtejshëm të pasurive, Prokurori i Shtetit ka lëshuar një urdhër për ndalimin e përkohshëm të 48 parcelave. Vlera e këtyre pronave, të cilat janë objekt i hetimeve, dyshohet se kap shifrën e miliona eurove. Nga Prokuroria Themelore në Prishtinë bëjnë të ditur se, në bashkëpunim të ngushtë me Policinë e Kosovës, do të vazhdojnë angazhimin maksimal për të zbardhur rastin, duke theksuar se lufta kundër korrupsionit dhe krimit ekonomik mbetet prioritet kryesor i institucionit.