Blerja e pazakontë në Facebook: Inxhinieri britanik shndërron një Boeing 737 në bunker nëntokësor

Një inxhinier nga Derbyshire i Mbretërisë së Bashkuar ka realizuar një projekt sa të çuditshëm, aq edhe ambicioz, duke shndërruar pjesën kryesore të një aeroplani Boeing 737-500 në një strehimore nëntokësore. Dave Billings, 45 vjeç, e gjeti këtë strukturë prej tre tonësh në platformën Facebook Marketplace, duke e blerë për rreth 4,600 euro, me qëllimin për ta kthyer atë në një hapësirë multifunksionale në oborrin e shtëpisë së tij në Hilton. Projekti, i frymëzuar nga filmi klasik i Luftës së Dytë Botërore 'The Great Escape', ka nisur vite më parë dhe deri tani ka kushtuar rreth 50,000 paund. Pjesa e aeroplanit është vendosur në një gropë me thellësi 4.3 metra, ndërsa Billings planifikon ta mbulojë atë me beton dhe dhe. Për të pasur akses në këtë ambient, ai ka projektuar një ashensor të fshehur brenda një kabine telefonike tradicionale britanike. Ndonëse ideja lindi nga pasioni i djalit të tij 8-vjeçar për aviacionin, bashkëshortja e inxhinierit, Beth, nuk u bind lehtë në fillim. Ajo e konsideroi blerjen e aeroplanit si shpenzim për një 'mbeturinë', por me kalimin e kohës ka filluar ta pranojë vizionin e bashkëshortit. I gjithë procesi i ndërtimit po dokumentohet në kanalin e tij në YouTube, 'Tornado Dave', dhe pritet të finalizohet deri në shkurt. Sipas Billings, kjo hapësirë është konceptuar si një zonë për festa dhe argëtim, por njëkohësisht shërben edhe si një bunker i mirëfilltë për situata emergjente. Struktura do të jetë e pajisur me energji elektrike, ujë, panele diellore dhe sistem ventilimi, duke përfshirë edhe tualetin origjinal të aeroplanit. Inxhinieri beson se, në rast të një konflikti global si Lufta e Tretë Botërore, familja e tij mund të mbijetojë brenda këtij bunkeri për të paktën tre muaj, duke pasur furnizimet e nevojshme.