Kina kërcënon paqen në Tajvan, G7 jep paralajmërimin e fortë nga Parisi

Ministrat e Jashtëm të vendeve anëtare të G7-s kanë lëshuar një deklaratë të përbashkët vonë të mërkurës në Paris, ku theksojnë se manovrat gjithnjë e më luftarake të Kinës në lindje të Tajvanit rrezikojnë seriozisht paqen rajonale dhe lirinë e lundrimit. Reagimi ka marrë përgjigje të menjëhershme nga Pekini, i cili e ka kundërshtuar atë si cenim të sovranitetit të brendshëm, ndërsa autoritetet në Tajpej kanë shprehur mirënjohjen për këtë mbështetje ndërkombëtare. Që prej muajit qershor, Kina – e cila e sheh ishullin si territor të vetin – ka intensifikuar praninë e saj përmes operacioneve të vazhdueshme të rojës bregdetare pranë brigjeve lindore. Autoritetet tajvaneze, që refuzojnë pretendimet e Pekinit, dyshojnë se këto lëvizje shërbejnë si fazë përgatitore për një rrethim detar, duke ndërthurur kapacitete ushtarake, paramilitare dhe civile. Megjithëse fuqi të tilla si Shtetet e Bashkuara, Britania e Madhe, Franca dhe Gjermania kishin ngritur shqetësime më herët, ky njoftim zyrtar nga G7 përfaqëson qëndrimin më të ashpër të bashkërenduar deri më tani kundër kësaj axhende. Në dokument theksohet qartë se operacionet në rritje agresive të Kinës në ujërat lindore të Tajvanit “kërcënojnë stabilitetin rajonal, lirinë e lundrimit dhe sigurinë e transportit detar ndërkombëtar”. “Ne rikonfirmuam kundërshtimin tonë ndaj çdo përpjekjeje të njëanshme për të ndryshuar status quo-në, veçanërisht përmes forcës ose detyrimit, apo kërcënimit për përdorimin e tyre”, shtohet më tej në njoftim. Si kundërpërgjigje, gjatë ditës së enjte, Ministria e Jashtme e Kinës e ka cilësuar këtë qëndrim si një shpërfillje të realitetit, një ndërhyrje të papranueshme në çështjet e brendshme dhe një përpjekje dashakeqe për të dëmtuar reputacionin e vendit. Zëdhënësja e kësaj ministrie, Mao Ning, u shpreh se dokumenti dëshmon qartësisht se “G7 është një grupim ideologjik që i përmbahet mentalitetit të Luftës së Frohtë dhe angazhohet në politikën e blloqeve”. Pekini nuk pranon asnjë pretendim për vetëvendosje nga ana e Tajvanit. Gjatë së enjtes, udhëheqësi kinez Xi Jinping kërkoi “ribashkimin” e plotë të ishullit me shtetin amë, duke u zotuar se ky objektiv do të përmbushet në rrugë paqësore. Në krahun tjetër, Presidenca e Tajvanit e ka përshëndetur qëndrimin e G7-s, duke nënvizuar se ruajtja e qetësisë dhe stabilitetit përgjatë Ngushticës së Tajvanit dhe në hapësirën Indo-Paqësore janë elementë jetikë për mbrojtjen dhe zhvillimin në shkallë globale.