Afrimi PDK-Vetëvendosje për Specialen dhe presidentin, Bytyçi: Kujdes nga pazaret politike

Takimi i fundit mes liderit të Partisë Demokratike të Kosovës, Bedri Hamza, dhe kryeministrit Albin Kurti ka riaktivizuar spekulimet rreth një paji të mundshëm politik mes dy partive. Në tavolinë janë vendosur dy çështje kyçe: projektligji për ndryshimin e Ligjit për Dhomat e Specializuara të Kosovës në Hagë dhe procesi i zgjedhjes së presidentit të ardhshëm të vendit. Sipas zhvillimeve aktuale, PDK-ja është shprehur e hapur për të diskutuar tema të ndryshme me Lëvizjen Vetëvendosje nëse sigurohet mbështetja për nismën e Speciales, ndërsa gjatë bisedës Hamza-Kurti është prekur edhe posti presidencial, pa u diskutuar ende emra të përveçëm. Megjithatë, ky skenar bashkëpunimi ka ngritur skepticizmin e analistëve dhe akademikëve. Profesori Enver Bytyçi e ka cilësuar si të gabuar qasjen ku PDK-ja mund të bëjë lëshime për kreun e shtetit në këmbim të ndryshimeve ligjore për gjykatën në Hagë, duke e krahasuar një lëvizje të tillë me një pazar politik. Ai vlerëson se stabiliteti institucional dhe shmangia e zgjedhjeve të reja duhet të jenë prioritet absolut për vendin. “Në situatën në të cilën ndodhet Kosova, kur ajo rrezikon të shkojë sërish në zgjedhje, çdo kompromis me opozitën është i justifikuar. Megjithatë, dëgjova se nëse PDK bën lëshime për presidentin për shkak të Gjykatës Speciale, kjo është e gabuar dhe i ngjan një pazari politik. Krijimi i institucioneve është shumë më i rëndësishëm se efektet e një marrëveshjeje konjukturale mes palëve,” ka deklaruar Bytyçi, duke paralajmëruar se një krizë e re do të dëmtonte rëndë shtetësinë dhe imazhin e vendit ndërkombëtarisht. Nga ana tjetër, shtrohet pyetja se sa reale është bashkimi i votave për këto dy çështje madhore. Lëvizja Vetëvendosje nuk ka pengesa morale për të mbështetur një nismë që rikthen kompetencat e gjykatës në Kosovë, pasi historikisht ka qenë kundër krijimit të saj. Një hap i tillë mund t'i sjellë edhe përfitime elektorale partisë në pushtet, nëse ajo i përgjigjet pozitivisht kërkesës së opozitës. Bytyçi thekson se interesi i opozitës për ndryshimin e ligjit është shtuar ndjeshëm pas vendimit të 16 shtatorit në Hagë për dënimin e katër ish-udhëheqësve të Ushtrisë Çlirimtare të Kosovës. Për miratimin e këtij projektligji, që mund të sigurojë deri në 100 vota përmes bashkëpunimit mes opozitës dhe mazhorancës, nevojitet gjithashtu konsensus për zgjedhjen e kreut të shtetit. “Ndryshimi i ligjit mund të bëhet edhe me 61 vota, por opozita nuk i ka vetë këto numra dhe i duhet mazhoranca. Nga ana tjetër, mazhoranca ka nevojë për votat e opozitës për të zgjedhur presidentin. Kështu arrihen të dy objektivat: ligji miratohet dhe institucionet konsolidohen, duke i sjellë fitim Kosovës,” shton ai, duke ngritur njëkohësisht pikëpyetje mbi aspektin kushtetues dhe ndikimin e këtyre zhvillimeve te ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi.