Nga brenda radhëve të inteligjencës te drejtimi i institucionit: Kush është Esmeralda Hasani, emri i ri në krye të SHISH?

Kreu i ri i Shërbimit Informativ të Shtetit në Shqipëri është zyrtarisht Esmeralda Hasani, e cila ka marrë drejtimin e këtij dikasteri të rëndësishëm sigurie. Dekreti për emërimin e saj është firmosur këtë të martë nga Presidenti i Republikës, Bajram Begaj, pas propozimit zyrtar të dorëzuar nga Kryeministri Edi Rama. Ndryshe nga praktikat e mëparshme për kreun e SHISH, Hasani përfaqëson një zgjedhje që vjen nga brenda strukturave të institucionit, ku ajo ka shërbyer gjatë dy viteve të fundit si drejtore e një prej departamenteve. Për sa i përket profilit të saj akademik, Esmeralda Hasani ka përfunduar studimet e larta në drejtësi dhe në të drejtën ndërkombëtare pranë Universitetit të Milanos-Bicocca. Gjithashtu, CV-ja e saj pasurohet me specializime në fushën e planifikimit dhe menaxhimit të projekteve evropiane, të ndjekura në institutin "Europa Cube Innovation Business School" në Bruksel. Në angazhimet e saj të mëparshme institucionale, ajo ka mbajtur detyrën e sekretares së përgjithshme në Ministrinë e Diasporës, periudhë gjatë së cilës ky dikaster drejtohej nga Pandeli Majko. Referuar të dhënave nga burimet e hapura publike online, pesë vite më parë Hasani ka ushtruar edhe funksionin e konsulentes pranë Kryeministrisë, ku është marrë kryesisht me planifikimin e projekteve dhe sigurimin e mbështetjes financiare.