Trump paralajmëron Meksikën me masa drastike ekonomike për shkak të karvanit të emigrantëve

Presidenti amerikan, Donald Trump, ka lëshuar një paralajmërim të ashpër ndaj autoriteteve meksikane, duke kërcënuar me dyfishimin e tarifave tregtare nëse shteti fqinj nuk merr masa urgjente për të ndalur lëvizjen e mbi një mijë emigrantëve drejt kufirit të Shteteve të Bashkuara. Në një reagim të publikuar në rrjetet sociale, Trump theksoi se këta individë nuk do të lejohen të hyjnë në territorin amerikan. “Ata nuk do të pranohen! Meksika duhet t’i ndalojë tani, përndryshe tarifat do të dyfishohen menjëherë. Autoritetet tona, përfshirë Patrullën Kufitare dhe ICE, janë në gatishmëri të plotë dhe nuk do të ketë asnjë lëshim”, deklaroi presidenti amerikan. Ky reagim vjen pas nisjes së një grupi prej rreth 1,500 emigrantësh, kryesisht me origjinë nga Amerika Qendrore, të cilët u shkëputën të martën nga qyteti i Tapachulas, afër kufirit me Guatemalën. Lëvizja e tyre drejt veriut është nxitur nga shpresa se rezultatet e zgjedhjeve të fundit në SHBA mund të krijonin një mundësi më të favorshme për të hyrë dhe për t'u punësuar në tokën amerikane.