Nagavci nga Kuvendi: Luftërat dhe krizat botërore nuk mund të shërbejnë si alibi për çdo ngritje çmimesh

Shefja e Grupit Parlamentar të Lëvizjes Vetëvendosje, Arbërie Nagavci, ka ngritur shqetësimin lidhur me ngarkesën financiare që po rëndon mbi qytetarët e Kosovës, veçanërisht gjatë periudhës dimërore kur buxheti i familjeve ballafaqohet me fatura më të larta për energji elektrike dhe ngrohje. Gjatë fjalës së saj në Kuvend, ajo u ndal te ndikimi i konflikteve dhe turbulencave globale në tregun e energjisë dhe artikujve ushqimorë, duke rikujtuar se pasojat e këtyre zhvillimeve në ekonominë vendase janë prezente që prej vitit 2022. “Kemi hyrë në muajt e dimrit, po afrohen edhe festat e fundvitit, familjeve u shtohen shpenzimet për ngrohje dhe energji. Në të njëjtën kohë, luftërat dhe krizat ekonomike po vazhdojnë të ndikojnë në çmimet e energjisë dhe të produkteve ushqimore në mbarë botën”, ka deklaruar Nagavci. Megjithatë, deputetja e Vetëvendosjes bëri thirrje për maturi dhe llogaridhënie, duke nënvizuar se faktori ndërkombëtar nuk duhet të keqpërdoret si pretekst për çdo lëvizje të çmimeve në treg. Sipas saj, institucionet dhe opinioni publik duhet të bëjnë dallimin e qartë mes shtrenjtimeve të diktuara nga shtrenjtimi i lëndës së parë dhe atyre që ndodhin për shkak të praktikave abuzive. “Krizat ndërkombëtare ndikojnë edhe në ekonominë tonë, madje shumë, por ato s’mund të përdoren si arsyetim për çdo shtrenjtim. Duhet të dihet se cilat çmime rriten për shkak të kostos së furnizimit apo lëndës së parë dhe cilat rriten në mënyrë abuzive”, është shprehur ajo. Në përmbyllje të fjalës së saj, Nagavci vuri anën e theksit te fakti se pavarësisht se rritja e kostos së jetesës ndikon te secili qytetar, shkalla e ndikimit dhe e vështirësisë ndryshon dukshëm nga njëra familje te tjetra.