Konflikti për pronën përfundon me breshëri plumbash ndaj vëllait në Gjakovë, Prokuroria kërkon paraburgim për të dyshuarin

Prokuroria Themelore në Gjakovë ka nisur hetimet formale dhe i ka paraqitur Gjykatës Themelore në Gjakovë kërkesën për caktimin e masës së paraburgimit prej 30 ditësh ndaj personit me inicialet S.L., i cili dyshohet për vepra të rënda penale. Sipas dosjes së prokurorisë, ngjarja e rëndë ka ndodhur më 10 tetor 2026, rreth orës 16:30, në fshatin Pjetërshan të Gjakovës. Pas një konflikti lidhur me çështje pronësore, i pandehuri S.L. dyshohet se ka tentuar t'i marrë jetën vëllait të tij, H.L., ndërkohë që ka vënë në rrezik serioz edhe jetën e kushëririt të tyre, P.L., duke shkrepur katër herë drejt tyre me një armë zjarri të tipit AK-47. Si pasojë e këtij sulmi me armë, dy viktimat kanë pësuar lëndime trupore dhe janë transportuar me urgjencë për në Spitalin e Përgjithshëm “Isa Grezda” në Gjakovë për të marrë ndihmën e nevojshme mjekësore. Gjatë hetimeve dhe veprimeve të ndërmarra, është zbuluar gjithashtu se i dyshuari S.L. onte armë në mënyrë të paligjshme, në kundërshtim të plotë me Ligjin mbi armët në Republikën e Kosovës. Përveç armës automatike AK-47, atij iu gjetën në posedim edhe një pushkë gjuetie, dhjetë fishekë të kalibrit 12ga dhe një fishek i kalibrit 7.62mm. Departamenti për Krime të Rënda pranë Prokurorisë Themelore në Gjakovë bën të ditur se veprimet e dyshuarit përbëjnë elementet e veprave penale “Vrasje e rëndë në tentativë”, e parashikuar sipas Kodit Penal, si dhe “Mbajtja në pronësi, kontroll ose posedim të paautorizuar të armëve”.