Nga fusha e gjelbër te ekrani i madh: Ylli portugez Cristiano Ronaldo hedh hapin e parë në kinematografi

Ylli i futbollit botëror, Cristiano Ronaldo, po e zgjeron fushën e tij të ndikimit edhe jashtë vijave të fushës së blertë, duke hyrë zyrtarisht në botën e prodhimit televiziv. Sportisti portugez ka njoftuar se kanë nisur tashmë punët për realizimin e serialit të tij të parë televiziv, i cili mban titullin “Day 1s” dhe fokusohet në dinamikat e futbollit britanik. Ky projekt ambicioz vjen si rezultat i bashkëpunimit të tij me regjisorin e njohur të filmave si “Kingsman”, Matthew Vaughn. Të dy ata janë bashkëthemelues të shtëpisë produksionit UR•Marv Studios, e cila do të kujdeset për mbarëvajtjen e xhirimeve. Në qendër të ngjarjeve të këtij seriali do të jetë figura e agjentit britanik Stanley Dalton, një rol ky që do t'i besohet aktorit të mirënjohur Damian Lewis. Përveç këtij emri të njohur, në këtë produksion kinematografik është paralajmëruar edhe pjesëmarrja e legjendës së futbollit, Thierry Henry, si dhe e reperit të njohur Dave, i cili pritet të jetë pjesë e kastit. Vetë Ronaldo e ka ndarë këtë lajm me ndjekësit e tij në platformat e rrjeteve sociale, duke mos fshehur entuziazmin e tij për këtë sipërmarrje krejtësisht të re në karrierën e tij shumëdimensionale. Aktorët dhe stafi krijues ende nuk kanë zbuluar ndonjë datë zyrtare se kur ky serial pritet të transmetohet për publikun.