Debat i ashpër në Kuvend mes Haxhiut dhe Çitakut rreth renditjes së Ligjit të Speciales

Seanca e Kuvendit të Kosovës është shoqëruar me tensione verbale dhe përplasje mes kryetares së Kuvendit, Albulena Haxhiu, dhe ushtrueses së detyrës së kryetares së Partisë Demokratike të Kosovës, Vlora Çitaku, pas miratimit të mocionit të kësaj partie për përfshirjen në rendin e ditës të Ligjit për Dhomat e Specializuara dhe Zyrën e Prokurorit të Specializuar në Hagë. Gjatë diskutimeve, Vlora Çitaku ka paraqitur një propozim konkret që kjo çështje të trajtohet më herët, duke kërkuar që të pozicionohet ose menjëherë pas pyetjeve parlamentare, ose pas shqyrtimit të marrëveshjeve ndërkombëtare. Mirëpo, ky propozim është kundërshtuar menjëherë nga kryetarja e Kuvendit, Albulena Haxhiu, e cila ka kërkuar nga zyrtarja e lartë e PDK-së që të mos ndryshohet renditja e paracaktuar e seancës. “Jo, jo. Mos e prish të lutem, nënkryetare, të lutem me mirëkuptim mos e prish tani me këtë propozim tjetër. Unitetin jo, por të paktën deklarimin e shumicës dhe vullnetin e shumicës”, ka deklaruar Haxhiu gjatë seancës. Duke e arsyetuar vendimin e saj, Haxhiu ka këmbëngulur që ky projektligj të mbetet pika e fundit e rendit të ditës, duke e lidhur këtë me natyrën e ndjeshme të çështjes dhe bisedimet e bëra më herët ndërmjet palëve. “Ju e dini qysh është situata, shumë mirë e dini se kemi diskutuar gjerë e gjatë. Kjo pikë radhitet e fundit e rendit të ditës. Dhe ju kisha lutur të mos bëni kërkesa të tjera, sepse shumë mirë jeni në dijeni për sensitivitetin, debatin dhe diskutimet”, është shprehur ajo.