Kriza energjetike në horizont: Sindikata e KEK-ut paralajmëron ndërprerje totale dhe grevë nëse nuk plotësohen kushtet

Të pakënaqur me të ardhurat financiare dhe kushtet e përgjithshme të punës, punonjësit e Korporatës Energjetike të Kosovës (KEK) kanë zhvilluar ditën e sotme një protestë pranë ndërtesës së menaxhmentit dhe Bordit Drejtues në kryeqytet. Gjatë kësaj tubese, ata bënë të ditur se një protestë e ngjashme do të përsëritet pas një jave në të njëjtin lokacion dhe orar, ndërsa theksuan se nuk përjashtohet as mundësia e ndërmarrjes së masave radikale përmes grevës. Kryetari i Sindikatës së Punëtorëve të KEK-ut, Xhelal Jashari, ka kërkuar hapjen e menjëhershme të dyerve të dialogut me drejtuesit e korporatës për të adresuar sfidat me të cilat ballafaqohet stafi. Duke iu drejtuar publikut dhe autoriteteve, ai theksoi seriozitetin e situatës dhe vendosmërinë e trupës punëtore. "Dëshira e klasës punëtore është të hyjmë në grevë. Ne iu themi se nuk po bëjmë shaka. Ne ju themi se s'po kërkojmë lëmoshë, ju themi uluni, dialogoni dhe zgjidheni këto problemi një nga një, sepse na ka ardhur thika në asht, jemi lodhur duke pritur disponimin e menaxhmentit", u shpreh Jashari. Më tej, kreu sindikalist lëshoi një paralajmërim të qartë se në mungesë të një takimi të ndërmjetësuar nga ministrja e Ekonomisë, Artane Rizvanolli, vendi rrezikon të paralizohet plotësisht nga mungesa e energjisë. "Të gjitha do t'i arrijmë të bashkuar, pa bashkim nuk ka rezultate. Unë besoj fuqishëm, sot do t'iu drejtohemi ministres Artane Rizvanolli me kërkesë për takim. Nëse nuk ka takim, e tërë Kosova do të jetë në terr", tha ai. Në mbështetje të këtyre qëndrimeve fali edhe nënkryetari i kësaj sindikate, Nexhmi Llumnica, i cili sqaroi arsyet e kësaj pakënaqësie të grumbulluar ndër vite, duke përmendur zhvillimet e fundit rreth buxhetit. "Këtu jemi për të shprehur pakënaqësitë. Ku mos me qenë të pakënaqur kur dëgjojmë rialokimin e mjeteve të buxhetit për 120 milionë euro, e që prej tyre merren 30 milionë euro për ndërmarrje publike. Çfarë kuptimi ka me na i marrë paratë neve e t’i jepen të tjerëve, e shtëpisë së vetë jo?", deklaroi Llumnica. Në shenjë mbështetjeje për këtë protestë ka dalë edhe Ali Gashi, kryetar i Sindikatës së Pavarur të Administratës së Kosovës, i cili e cilësoi legjitime betejën e punëtorëve të energjetikës. "Sot nuk kam ardhur për të shprehur solidaritet, kam ardhur për të ngritur zërin për punën, sakrificën tuaj dhe për padrejtësitë që përballeni çdo ditë", përfundoi Gashi.