Pas operacionit të nëntë, Lindsey Vonn tregon pajisjet metalike të hequra nga këmba

Legjenda e skijimit amerikan, Lindsey Vonn, ka ndarë me ndjekësit detaje rreth gjendjes së saj shëndetësore, pas përfundimit të ndërhyrjes së saj të nëntë kirurgjikale në këmbën e majtë. Sportistja e njohur është shprehur e lumtur me ecurinë e operacionit, ndërsa përmes një postimi në rrjetin social Instagram, e dukshëm e lodhur, tha: “Operacioni shkoi mirë. Së shpejti do t'ju jap më shumë informacione”. Përveç përditësimit për shëndetin e saj, 42-vjeçarja ka publikuar edhe pamje të materialit mjekësor që iu hoq nga trupi gjatë kësaj procedure. Në një qese plastike dukeshin qartë tri pllaka metalike dhe mbi dhjetë vida, disa prej të cilave kishin përmasa mjaft të mëdha. “Më në fund, e gjithë kjo që kisha në këmbë u hoq”, theksoi Vonn në mbishkrimin e saj. Kujtojmë se ish-kampionja kishte pësuar një frakturë të ndërlikuar të tibias së majtë pas një rrëzimi gjatë Lojërave Olimpike të muajit shkurt të këtij viti. Ky lëndim i rëndë e detyroi t'i nënshtrohej disa ndërhyrjeve për vendosjen e implanteve që shërbyen për stabilizimin e kockës, të cilat tashmë janë larguar përfundimisht. Para këtij operacioni, fituesja e katërfishtë e Kupës së Botës në renditjen e përgjithshme kishte sqaruar se heqja e gjithë materialit të huaj ishte e domosdoshme, pasi kjo i hap rrugën rindërtimit të ligamentit të kryqëzuar anterior (ACL) në gjurin e majtë. Si pasojë e kësaj ndërhyrjeje në ligament, Vonn do të duhet të përballet me një proces tjetër rikuperimi që parashikohet të zgjasë nga gjashtë deri në nëntë muaj, periudhë kjo e nevojshme edhe për shërimin e hapësirave të mbetura në kockë nga vidat e hequra. Pavarësisht sfidave të vazhdueshme shëndetësore, Vonn ka sinjalizuar se synon rikthimin në pistat e skijimit, megjithëse mbetet ende e paqartë nëse ajo do të jetë sërish pjesë e garave zyrtare të Kupës së Botës.