Tragjedi në Brooklyn: Shembja e pallatit trekatëshe lë dy të vdekur dhe 17 të lënduar

Një ngjarje e rëndë ka tronditur New York-un, ku pas shembjes së papritur të një ndërtese trekatëshe kanë rënë viktimë dy persona, ndërsa 17 të tjerë kanë pësuar lëndime. Në mesin e të plagosurve raportohet se janë edhe shtatë të mitur, ndërkohë që katër prej të lënduarve po luftojnë për jetën në gjendje kritike. Incidenti tragjik u regjistrua rreth orës 16:00 të ditës së mërkurë, në lagjen Flatbush të zonës së Brooklynit. Deri më tani, arsyet që çuan në këtë katastrofë mbeten enigmë, ndërsa organet kompetente kanë nisur një hetim të thelluar për të zbuluar shkaqet e sakta të kësaj ngjarjeje. Menjëherë pas rënies së strukturës, forca të shumta të zjarrfikësve dhe njësive të shpëtimit zbarkuan në vendngjarje, duke nisur menjëherë aksionin për kapërcimin e rrezikut dhe nxjerrjen e qytetarëve të bllokuar nën masivin e betonit. Pamjet e transmetuara nga vendi i ngjarjes dëshmojnë punën intensive të efektivëve të zjarrfikësve, të cilët përmes shkallëve dhe barelave po nxjerrin të mbijetuarit nga grumbujt e gërmadhave dhe po i dërgojnë me urgjencë drejt automjeteve mjekësore. Autoritetet ende nuk kanë një shifër të saktë se sa persona mund të ndodhen ende të zënë ngushtë nën rrënoja. Ekipet e emergjencës po vijojnë pandërprerë kërkimet, megjithëse operacioni cilësohet si tejet i rrezikshëm për shkak të rrezikut të shembjeve të mëtejshme të strukturës së dëmtuar. Sipas deklaratës së komisionerit të Departamentit të Zjarrfikësve të New Yorkut, aksioni i kërkim-shpëtimit paraqet sfida të jashtëzakonshme dhe përbën një rrezik real edhe për vetë trupat e ndërhyrjes. Grupet hetimore po hetojnë gjithashtu pistën nëse shembja mund të jetë shkaktuar nga punimet që po kryheshin në një kantier ndërtimi pranë saj, ku sipas raportimeve dyshohet se ka persona të bllokuar si pasojë e incidentit. Nga ana e tyre, zyrtarët kanë theksuar se aksioni në terren do të vazhdojë pa u ndalur derisa i gjithë perimetri të kontrollohet me imtësi dhe të sigurohet se asnjë person tjetër nuk ka mbetur i bllokuar nën rrënoja.