Pranga shtetasit turk në kryeqytet: Përdori kartelat bankare të të huajve për blerje virtuale

Policia e Kosovës ka arrestuar gjatë ditës së mërkurë në Prishtinë një shtetas turk, i cili dyshohet se është përfshirë në krime kibernetike. Sipas autoriteteve, ai dyshohet se ka depërtuar në sisteme kompjuterike dhe ka shfrytëzuar paautorizim kartelat bankare të qytetarëve të huaj për të realizuar transaksione dhe blerje në internet. Gjatë këtij operacioni policor, njësitet përkatëse kanë sekuestruar pajisje të ndryshme elektronike dhe materiale që shërbejnë si provë materiale, përfshirë dy njësi kompjuterike, dy aparate celulare, dy USB, si dhe dokumentacion tjetër të rëndësishëm që lidhet drejtpërdrejt me këtë veprimtari të paligjshme. I dyshuari është shoqëruar në stacionin policor ku është marrë në pyetje nga hetuesit. Me urdhër të prokurorit të shtetit, ndaj tij është caktuar masa e ndalimit dhe është dërguar në qendrën e mbajtjes. Ndërkaq, institucionet e rendit e kanë iniciuar rastin zyrtarisht, i cili është kualifikuar nga organet e drejtësisë si vepër penale “Hyrje e paautorizuar kompjuterike dhe lëshim i çeqeve pa mbulesë”.