Spanja nën ethet e protestave masive: Mbi 170 mijë qytetarë kërkojnë banesa të përballueshme

Spanja është përfshirë nga vala e parë e grevës së përgjithshme pas 14 vitesh, ku rreth 170 mijë qytetarë kanë mbushur rrugët e qendrave kryesore urbane. Sindikatat më të mëdha të vendit kanë organizuar këtë mobilizim masiv si reagim ndaj rritjes galopante të kostos së jetesës dhe çmimeve marramendëse të banesave, të cilat janë bërë të papërballueshme për pjesën më të madhe të popullsisë. Në kryeqytetin Madrid, rreth 120 mijë persona marshuan për të kërkuar ndryshime, ndërsa në Barcelonë numri i protestuesve i kaloi 50 mijë. Përveç këtyre dy metropoleve, tubime të ngjashme u zhvilluan në mbarë vendin, duke shkaktuar paralizë të shërbimeve publike dhe ndërprerje të ndjeshme në sektorin e transportit. Ndërsa pjesa më e madhe e demonstratave u zhvillua në frymë paqësore, situata në Barcelonë degjeneroi në përplasje të dhunshme. Në zonën e 'Passeig de Gràcia', pranë sheshit 'Plaça de Catalunya', grupe personash të maskuar u përballën me policinë, duke i vënë flakën kazanëve të mbeturinave dhe duke shkatërruar vitrina dyqanesh. Raportohet se protestuesit kanë hedhur fishekzjarrë ndaj forcave të rendit, ndërsa kanë tentuar të thyejnë dyqane të njohura si ai i Apple dhe kanë grabitur dyqanin Lego. Për të shpërndarë turmën, policia është detyruar të përdorë gaz lotsjellës. Ministria e Brendshme e Spanjës ka konfirmuar arrestimin e dhjetëra personave për incidente të ndryshme. Veç përplasjeve me policinë, janë shënuar sulme edhe ndaj zyrave të agjencive imobiliare. Pavarësisht këtyre skenave, pjesëmarrësit theksuan se protesta ishte kryesisht civile, me praninë e familjeve, fëmijëve dhe të moshuarve, ndërsa zjarret e raportuara në zonën e 'Las Ramblas' ndodhën vetëm gjatë orëve të mbrëmjes. Pepe Álvarez, kreu i sindikatës UGT, e vlerësoi këtë grevë si një sukses të padiskutueshëm për shkak të pjesëmarrjes masive. Në të njëjtën linjë, drejtuesi i sindikatës CC OO, Unai Sordo, e cilësoi reagimin e qytetarëve si një moment kthesë shumë të rëndësishëm për kërkesat e tyre legjitime ndaj qeverisë.