Drama e 13-vjeçares në Fushë Kosovë: Nga raportimi për zhdukje te denoncimi për dhunim

Një ngjarje tronditëse ka ndodhur në Fushë Kosovë, ku një e mitur 13-vjeçare, e cila ishte shpallur e zhdukur nga familjarët e saj, ka denoncuar më pas një 21-vjeçar për veprën penale të dhunimit. Sipas informacioneve, rasti ka nisur të hënën kur gjyshi i të miturës, e cila së fundmi ishte vendosur për të jetuar në këtë komunë, ka njoftuar Policinë për zhdukjen e saj. Megjithatë, dy ditë më vonë, vajza është paraqitur vetë në stacionin policor, ku ka ngritur dyshime të rënda ndaj një 21-vjeçari, me të cilin thuhet se kishte bashkëjetuar. Në trajtimin e këtij rasti është përfshirë menjëherë Qendra për Punë Sociale. Abaz Xhigoli, drejtor i këtij institucioni, bëri të ditur se e mitura është dërguar në një strehimore të sigurt, ku po ndiqet nga menaxheri i rastit. Ai gjithashtu konfirmoi se e mitura ka pasur histori të mëparshme me Qendrën, ku është trajtuar përmes këshillimeve psikologjike me referim të prindërve. Prokuroria Themelore ka konfirmuar arrestimin e të dyshuarit. Zëdhënësja Kaltrina Shala njoftoi se me urdhër të prokurorit, 21-vjeçari është ndaluar për 48 orë nën dyshimin për kryerjen e veprës penale “Dhunimi”, sipas nenit 227 të Kodit Penal të Republikës së Kosovës. Organet e hetuesisë janë duke ndërmarrë të gjitha veprimet e nevojshme për zbardhjen e plotë të rrethanave të kësaj ngjarjeje. Ndërkohë, viktima, përveç strehimit, është dërguar edhe për ekzaminimet e nevojshme mjekësore në Institutin e Mjekësisë Ligjore, ndërsa hetimet për këtë rast vazhdojnë.