Incidenti gjatë stërvitjes së FSK-së, Mehmeti-Selimi: Lëndimet nuk duhet të politizohen

Deputetja e Lëvizjes Vetëvendosje, Shqipe Mehmeti-Selimi, ka dalë me një reagim publik lidhur me incidentin e ndodhur së fundmi gjatë një ushtrimi ushtarak të Forcës së Sigurisë së Kosovës (FSK), ku një ushtar mbeti me lëndime të lehta. Ajo ka vlerësuar se tentativat për të instrumentalizuar këtë ngjarje për qëllime politike apo mediatike janë të papranueshme. Në një shkrim të publikuar në rrjetet sociale, deputetja shpjegoi se gjatë trajnimeve reale ushtarake, ku ushtarët operojnë me pajisje dhe armatim, aksidentet e këtij lloji janë ndër rreziqet e natyrshme. Ajo konfirmoi se pjesëtari i FSK-së mori ndihmën e nevojshme mjekësore dhe është liruar për në shtëpi brenda së njëjtës ditë, duke i uruar atij shërim sa më të shpejtë. “Është e papranueshme që një incident i tillë të shndërrohet në mjet për debat politik apo për të goditur institucionet tona të sigurisë. Siguria e vendit dhe profesionalizmi i FSK-së duhet të jenë tema që na bashkojnë, e jo shkak për përfitime ditore. Çdo rast duhet të trajtohet me seriozitet dhe mbështetur në fakte,” theksoi Mehmeti-Selimi. Tutje, ajo nënvizoi se FSK-ja po kalon nëpër një proces historik të transformimit drejt një force moderne dhe tejet profesionale. Sipas saj, nën qeverisjen aktuale, janë shënuar hapa të rëndësishëm sa i përket modernizimit të armatimit, rritjes së investimeve në sektorin e mbrojtjes dhe zgjerimit të kapaciteteve njerëzore e operacionale. Kujtojmë se incidenti në fjalë, i cili ka ndodhur gjatë qitjeve stërvitore në Babaj të Bokës, ka nxitur reagime të ndryshme në opinionin publik, mirëpo autoritetet theksojnë se zhvillimi i këtyre aktiviteteve është pjesë e rrugëtimit të forcës për të qenë sa më e gatshme për përmbushjen e misionit të saj kushtetues.