FSK në rrugën drejt standardeve të NATO-s: Validimi i ekipeve mjekësore në fokus

Ministri i Mbrojtjes, Ejup Maqedonci, i shoqëruar nga komandanti i Forcës së Sigurisë së Kosovës (FSK), gjenerallejtënant Bashkim Jashari, si dhe drejtori i Ekipit Këshillues dhe Ndërlidhës të NATO-s (NALT), gjeneral brigade Thomas Schulte-Borghoff, kanë inspektuar nga afër dy ekipet mjekësore të FSK-së. Ky aktivitet është realizuar në kuadër të procesit të validimit të kapaciteteve mjekësore të nivelit ‘Role 1’. Gjatë kësaj vizite, udhëheqësit e lartë të mbrojtjes u njohën për së afërmi me gatishmërinë operacionale, pajisjet teknike dhe përgatitjet profesionale të ekipeve mjekësore. Vlerësimi i këtyre kapaciteteve po kryhet nga ekspertë të Qendrës së Ekselencës së NATO-s për Mjekësinë Ushtarake. Përmes një publikimi në rrjetet sociale, ministri Maqedonci ka vlerësuar lartë rëndësinë e këtij vlerësimi. Ai theksoi se ky proces është thelbësor për modernizimin e FSK-së dhe për harmonizimin e plotë të standardeve të saj me ato të Aleancës Veri-Atlantike. “Ky proces përbën një hap të rëndësishëm drejt avancimit të kapaciteteve mjekësore të FSK-së, përmbushjes së standardeve të NATO-s dhe forcimit të ndërveprueshmërisë me ushtritë e vendeve aleate”, ka deklaruar Maqedonci. Validimi i kapaciteteve të nivelit ‘Role 1’ ka për qëllim testimin dhe vlerësimin e aftësisë së ekipeve mjekësore për të ofruar përkujdesje fillestare shëndetësore gjatë operacioneve ushtarake, duke dëshmuar kështu përputhshmërinë e tyre me kriteret strikte të kërkuara nga NATO.