Goditje trafikut të drogës në Greqi: Arrestohet çifti shqiptaro-grek me gati 19 kg marijuanë

Një operacion i mirëorganizuar nga Njësia e Antidrogës pranë Nëndrejtorisë së Hetimit dhe Ndjekjes së Krimeve në Kostur të Greqisë, ka çuar në pranga një 38-vjeçar shqiptar dhe partneren e tij 34-vjeçare greke. Çifti u ndalua mbrëmjen e kaluar në një zonë të Kosturit, nën akuzën e trafikimit të lëndëve narkotike. Sipas njoftimit zyrtar, arrestimi erdhi si rezultat i shfrytëzimit të informacioneve operative që kishin në dispozicion forcat e rendit. Gjatë patrullimit në zonë, policia identifikoi një automjet që lëvizte në mënyrë të dyshimtë. Pas ndalimit të mjetit për kontroll, brenda tij u gjetën dy çanta udhëtimi që përmbanin 18 pako me marijuanë, me një peshë totale prej 18.8 kilogramësh. Në cilësinë e provës materiale, autoritetet greke sekuestruan lëndën narkotike, automjetin e përdorur për transportin e drogës, si dhe dy telefona celularë bashkë me kartat SIM përkatëse. Të arrestuarit janë dërguar në ambientet e policisë, ndërsa dosja penale ndaj tyre i ka kaluar Prokurorisë së Gjykatës Penale në Kostur për procedurat e mëtejshme ligjore. Ky rast shënon një tjetër ndërhyrje të suksesshme në kuadër të përpjekjeve të shtuara për të luftuar trafikun ndërkombëtar të narkotikëve. Vetëm në 15 muajt e fundit, policia greke ka arritur të sekuestrojë mbi 1.3 ton marijuanë në zona të ndryshme si Igumenica, Janina, Kosturi, Follorina dhe Selaniku. Statistikat tregojnë se një pjesë e konsiderueshme e këtyre dërgesave e ka burimin në Shqipëri, ku linja Sarandë-Igumenicë mbetet një ndër akset më të shfrytëzuara nga trafikantët. Përpjekjet e autoriteteve për të kontrolluar kufirin janë intensifikuar, duke përfshirë këtu edhe operacione detare për ndalimin e skafeve të ngarkuara me drogë.