Grabitje e dhunshme në Gjakovë: 7 vite burg për të akuzuarin që vodhi 115 euro

Gjykata Themelore në Gjakovë ka shpallur aktgjykim dënues ndaj shtetasit A.M., i cili është shpallur fajtor për veprën penale të grabitjes. Për këtë veprimtari kriminale, gjykata e ka dënuar të pandehurin me 7 vite burgim efektiv, si dhe me një gjobë shtesë prej 500 eurosh. Ngjarja për të cilën akuzohet A.M. ka ndodhur më 1 qershor 2026, rreth orës 17:50, prapa këndit të lojërave “Kids Center” në rrugën “Ferid Domi” në Gjakovë. Sipas dosjes së prokurorisë, i pandehuri në bashkëpunim me dy të mitur, të identifikuar si I.A. dhe A.A., kishin organizuar një takim me viktimën E.B. me qëllim të kryerjes së grabitjes. Sapo takimi u realizua, A.M. iu afrua viktimës duke e kërcënuar me një thikë. Pasi e kapi për çantën e krahut, i pandehuri përdori dorezën e thikës për ta goditur disa herë viktimën në krahun e majtë, ndërsa më pas preu rripin e çantës për t'ia rrëmbyer atë me forcë. Nga portofoli që gjendej brenda çantës së zezë, grabitësi arriti të përvetësonte shumën prej 115 eurosh. Sipas njoftimit të gjykatës, pasi konstatoi se në çantë nuk kishte më vlerë të konsiderueshme, i pandehuri dhe bashkëpunëtorët e tij të mitur vazhduan dhunën fizike ndaj viktimës, duke e goditur me grushte në pjesë të ndryshme të trupit, veprime këto që i shkaktuan viktimës lëndime të lehta trupore. Trupi gjykues i udhëhequr nga gjyqtari Sulltan Dobraj, pas përfundimit të shqyrtimit gjyqësor, konstatoi se provat e prezantuara vërtetojnë fajësinë e të pandehurit për veprën penale të grabitjes, e cila është e sanksionuar sipas Kodit Penal të Republikës së Kosovës. Palët e pakënaqura me këtë vendim të shkallës së parë kanë të drejtën e ankesës brenda afatit ligjor prej 30 ditësh, duke filluar nga momenti i pranimit të aktgjykimit në formë të shkruar.