Fillim i ri për Mohamed Salah: Kapiteni i Egjiptit i bashkohet për herë të parë epokës së Ali Maher

Ylli i futbollit botëror, Mohamed Salah, ka nisur zyrtarisht aventurën e tij nën drejtimin e trajnerit të ri të Egjiptit, Ali Maher. Kapiteni i “Faraonëve” u raportua në bazën stërvitore të kombëtares gjatë së martës, duke u bërë pjesë e grumbullimit për ndeshjet e radhës ndaj Malavit. Momenti i mbërritjes së sulmuesit të Liverpoolit u shoqërua me një pritje të ngrohtë nga ana e teknikut Maher. Fotografitë e shpërndara nga Federata Egjiptiane e Futbollit pasqyrojnë një atmosferë tejet pozitive, ku Salah shihet duke bashkëbiseduar përzemërsisht me trajnerin dhe stafin e tij teknik, duke dëshmuar harmoni në prag të sfidave të rëndësishme. Këto përgatitje vijnë si pjesë e fushatës kualifikuese për Kupën e Kombeve të Afrikës 2027, ku Egjipti do të përballet me Malavin në dy takime të programuara për datat 13 dhe 17 nëntor. Ky grumbullim është domethënës pasi shënon bashkëpunimin e parë mes Salah dhe Maher, ky i fundit i emëruar në krye të pankinës pas largimit të Hossam Hassan të shtunën e shkuar. Kujtojmë se mungesa e Salah në ndeshjen e kaluar ndaj Sudanit të Jugut erdhi pas një marrëveshjeje për pushim, pasi lojtari u aktivizua për 60 minuta kundër Angolës. Federata kishte sqaruar asokohe se ky vendim ishte marrë për të ruajtur gjendjen fizike të futbollistit, duke pasur parasysh kushtet problematike të fushës artificiale ku do të zhvillohej sfida pasuese.