Ismajli 'thumbon' epokën Sylvinho: Maran po aplikon futboll modern, jemi gati për fitore ndaj Finlandës

Në prag të përballjes vendimtare për Ligën e Kombeve kundër Finlandës, mbrojtësi i kombëtares shqiptare, Ardian Ismajli, ka shprehur besim të plotë për një rezultat pozitiv. Në konferencën për media, ai theksoi se skuadra e ndjen obligim moral dhe profesional për të mbajtur pozitën e parë në grup. “Jemi përgatitur maksimalisht. E dimë rëndësinë e kësaj sfide dhe e shohim si detyrim mbajtjen e kreut. Jemi grupi më cilësor në grup dhe këtë duhet ta konfirmojmë në fushën e blertë. Në ndeshjen e parë në Finlandë, nëse përjashtojmë kartonin e kuq, kemi zhvilluar një prej paraqitjeve më të mira të viteve të fundit. Fati nuk ishte me ne, por gjithçka tani varet nga ne”, deklaroi Ismajli. Duke analizuar humbjen 2-1 në përballjen e parë, mbrojtësi shtoi se skuadra duhet të jetë më e kujdesshme ndaj goditjeve standarde. Sipas tij, përqendrimi është çelësi për të shmangur gabimet që mund të shfrytëzohen nga kundërshtari, ndërsa theksoi se ekipi nuk ndjen stres, por vetëm motivim kur luan para tifozëve në stadiumin “Air Albania”. Një pjesë të rëndësishme të fjalës së tij, Ismajli ia kushtoi ndryshimit të filozofisë së lojës nën drejtimin e selektorit Rolando Maran. Ai nuk nguroi të bëjë një krahasim me ish-trajnerin Sylvinho, duke kritikuar qasjen e këtij të fundit. “Sylvinho luante një futboll mjaft defensiv dhe statik, ku kërkohej që çdo lojtar të qëndronte strikt në pozicionin e tij. Ky lloj futbolli nuk është më bashkëkohor. Maran po na ndihmon të aplikojmë një futboll modern, duke na shtyrë drejt presingut të lartë. Kjo na lejon të detyrojmë kundërshtarin në gabime dhe të shfrytëzojmë aftësitë tona në duelet një kundër një”, sqaroi mbrojtësi. Në përmbyllje, Ismajli u ndal te mbështetja e jashtëzakonshme e tifozëve shqiptarë, të cilët i cilësoi si lojtarin e 12-të të skuadrës. Ai premtoi se futbollistët do të japin maksimumin në fushë për t'i bërë krenarë mbështetësit kuqezi, pavarësisht vështirësive që sjell çdo ndeshje ndërkombëtare. Kujtojmë se sfida mes Shqipërisë dhe Finlandës do të zhvillohet nesër në stadiumin “Air Albania”, duke filluar nga ora 20:45.