Selektori i Anglisë: Fitorja 7:0 ndaj Kroacisë ishte një rezultat i çmendur

Kombëtarja e Anglisë do ta presë Kroacinë të enjten, nga ora 20:45, në stadiumin “Wembley”, në kuadër të xhiros së pestë të Ligës së Kombeve. Skuadra e drejtuar nga Thomas Tuchel hyn në këtë përballje si favorite, pasi në fillim të tetorit, në Rijekë, e kishte mposhtur Kroacinë me rezultat të thellë 7:0, duke i shkaktuar humbjen më të rëndë në historinë e saj. Trajneri gjerman, në konferencën për media, ka folur për përballjen e radhës me kombëtaren e drejtuar nga Slaven Biliç. A është Harry Kane futbollisti më i mirë anglez i të gjitha kohërave?Tuchel:Nuk e di nëse është më i miri. Por sigurisht që është në mesin e më të mirëve, gjë që tashmë është dëshmuar edhe me këtë Top të Artë. Ai ka rekordet e tij, të cilat do të vazhdojnë të rriten, pasi do të shënojë edhe më shumë gola. Nesër do të luajë si kapiten dhe do t'ua prezantojë tifozëve tanë Topin e Artë. Gjithashtu, do të hyjë në histori si futbollisti me më së shumti paraqitje për Anglinë. Kjo është një ndeshje shumë e rëndësishme, nuk bëhet fjalë për një miqësore. Për ne kanë shumë rëndësi ndeshjet e tilla. A do të pushoni disa futbollistë ndaj Kroacisë, duke pasur parasysh se të dielën ju pret ndeshja me Spanjën?Tuchel:Futbollistët janë mësuar të luajnë dy herë në javë dhe janë përshtatur me këtë ritëm. Prandaj, nuk shoh ndonjë arsye për ta bërë një gjë të tillë. Nëse do të jetë e nevojshme të menaxhojmë minutazhin, mund ta bëjmë këtë pas 60 apo 70 minutash lojë. Gjithmonë ekziston kjo mundësi, pasi duam t'u japim hapësirë edhe futbollistëve që presin rastin e tyre. Megjithatë, në përgjithësi nuk shoh ndonjë problem që të zbresim në fushë me dy formacione të forta. Ezri Konsa dhe Djed Spence nuk do të luajnë ndaj Kroacisë të enjten, por deri të shtunën do t'i rikthehen stërvitjeve të plota. Sipas informacioneve të mia, ata do të jenë të gatshëm për ndeshjen ndaj Spanjës të dielën. Për fitoren 7:0 ndaj Kroacisë...Tuchel:E merituam fitoren 7:0 ndaj Kroacisë atë mbrëmje. Megjithatë, sipas mendimit tim, ai mbetet një rezultat i çmendur, i cili nuk pasqyronte cilësinë dhe statusin e Kroacisë. Kroatët treguan reagim menjëherë pas asaj ndeshjeje. Mendoj se mund ta kishin mposhtur Spanjën. Patën raste të mira shënimi, pësuan një gol në fund dhe luajtën edhe me një futbollist më pak. Ata reaguan menjëherë. Kroacia është një shtet krenar, me shumë cilësi, dhe mendoj se dëshiron të dëshmojë se ajo humbje ishte vetëm një episod i keq. Për ne është e rëndësishme ta harrojmë atë rezultat dhe në këtë përballje të luajmë me intensitet të lartë.A ju ka lehtësuar fakti që Harry Kane është pjesë e kombëtares në vendimin për ta marrë drejtimin e saj?Tuchel: Harry ishte një futbollist që binte në sy dhe, natyrisht, e njihja mirë. Kishim punuar së bashku te Bayern Munihu, kështu që kjo ma lehtësoi dukshëm vendimin. Por isha gjithashtu shumë i emocionuar nga mundësia për t'iu afruar sërish Premier League-s, për të punuar me këtë grup futbollistësh dhe për të pasur mundësinë të përzgjedh lojtarët që do t'i ftoj në kombëtare. Jam i mahnitur nga qasja e tyre, uniteti dhe energjia që tregojnë. Ata e kanë dëshmuar këtë, prandaj kjo skuadër është kaq emocionuese. Për mua ka shumë rëndësi që Harry është kapiten. Kjo ishte një përparësi shtesë, një bonus. Ne biseduam në shtëpinë e tij në Munih për këtë detyrë dhe për atë që dëshironim të arrinim të dy. Njiheshim me njëri-tjetrin dhe e dija se kisha një kapiten të përkryer, një lider që me shembullin e tij u tregon të tjerëve se si duhet të sillen. Është kënaqësi të kesh një njeri të tillë në skuadër.